Phaltan Doctor Case:सातारा प्रकरणात मोठी अपडेट; पोलिसांच्या हाती लागले डॉक्टर आणि आरोपीमधील चॅटिंग अन् सीसीटीव्ही फुटेज

साताऱ्यातील उपजिल्हा रुग्णालयातील महिला डॉक्टरने आत्महत्या केल्याच्या घटनेने महाराष्ट्र हादरला. डॉक्टरने आपल्या हातावर पेनाने सुसाईड नोट लिहून जीवन संपवलं होतं. या प्रकरणांमध्ये सुरू असलेल्या तपासाबाबत पोलीस अधीक्षक तुषार दोशी यांनी आज महत्वाचे खुलासे केलेत. मृत महिला डॉक्टर आणि आरोपी यांच्यात वारंवार चॅटिंग सुरू होतं, असा खळबळजनक खुलासा पोलीस अधिक्षकांनी केलाय.

फलटण शहर पोलीस ठाण्यात आत्महत्येचा गुन्हा दाखल करण्यात आलाय. या प्रकरणातील दोन्ही आरोपी अटकेत आहेत.दोन्ही आरोपी पोलीस कस्टडीमध्ये असून त्यांचा डीवायएसपी यांच्यामार्फत तपास सुरूय. सीडीआर असेल किंवा इतर पुरावे, यामार्फत आरोपीविरुद्ध काय पुरावे मिळतात का याबाबत तपास सुरू आहे.

प्राथमिक पोस्ट मॉर्टम रिपोर्ट मिळाले असून फायनल रिपोर्ट आज किंवा उद्या मिळेल, अशी माहिती पोलीस अधिक्षकांनी दिलीय. काही फॉरेन्सिक रिपोर्ट देखील लवकरच हाती येतील,असेही पोलीस म्हणालेत. त्यानुसार डॉक्टर महिला आणि आरोपी यांच्यात नक्की संबंध होते का हे तपासातून समोर येईल, असेही पोलीस अधीक्षक तुषार दोषी म्हणालेत.

सीसीटीव्ही फुटेज मिळालेत

पोलिसांच्या हाती हॉटेलचे सीसीटीव्ही फुटेज लागले आहेत. यात महिला डॉक्टर हॉटेलमध्ये जाताना दिसत आहे. हॉटेलमधील डीव्हीआर पोलिासंनी जप्त केलाय. डीव्हीआर तपासला असता, कोणतीही संशयास्पद गोष्ट आढळली नाहीये. तरीसुद्धा ती हॉटेलवर का गेली याचा पूर्ण तपास करण्यात येणार असल्याची माहिती पोलीस अधीक्षकांनी दिलीय.

डॉक्टर महिलेचे वारंवार चॅटिंग

या प्रकरणाच्या तपासा संदर्भामध्ये आमच्यावर कोणाचाही दबाव नाहीत. गृह विभागाकडून हा तपास पूर्णपणे निष्पक्ष व्हावा, अशा सूचना आम्हाला मिळाल्याची माहिती पोलीस अधिक्षक म्हणालेत. त्यानुसार तपास चालू असून आता आरोपीचे सीडीआर आणि चॅटिग हाती आली आहे. यात मृत डॉक्टर आणि आरोपी यांच्यात वारंवार चॅटिंग सुरू होतं. डॉक्टर महिला आरोपींच्या संपर्कामध्ये होती, असा खुलासा पोलीस अधिक्षकांनी केलाय.