Maharashtra Politics: विधानसभेतही सांगली पॅटर्न? रोहित पाटील यांच्याविरोधात विशाल पाटलांची बंडाळी?

भरत मोहळकर, साम टीव्ही, प्रतिनिधी

लोकसभेला सांगलीत बंडखोरी करत विजयी झालेल्या विशाल पाटलांनी पुन्हा एकदा बंडखोरीचे संकेत दिलेत. महाविकास आघाडीत तासगाव-कवठे महांकाळ मतदारसंघ शरद पवारांच्या राष्ट्रवादीकडे आहे. त्यातच शरद पवारांनी रोहित पाटलांची उमेदवारी जाहीर केलीय. त्यापाठोपाठ विशाल पाटलांनी तासगाव-कवठे महांकाळला अजित घोरपडेंशिवाय पर्याय नसल्याचं सांगत पुन्हा बंडखोरीचे संकेत दिलेत. त्यामुळे आर आर पाटलांचा मुलगा रोहित पाटलांच्या अडचणीत वाढ झालीय.

विशाल पाटलांनी लोकसभेला बंडखोरी करत ठाकरे गटाच्या मल्लाला आस्मान दाखवलं. त्यानंतर त्यांनी आपला मोर्चा कवंठे महांकाळकडे वळवलाय. विशाल पाटलांनी अजित घोरपडेंना पाठिंबा देण्याचा निर्धार केल्यामुळे मविआत पुन्हा चलबिचल सुरू झाली.

लोकसभेला पराभव झाल्यानंतर माजी खासदार संजय पाटलांनी तासगाव- कवठे महांकाळ विधानसभेसाठी मुलगा प्रभाकर पाटलांसाठी मोर्चेबांधणी सुरू केलीय. तर शरद पवारांनी रोहित पाटलांना उमेदवारी देण्याचं जाहीर केलंय. दुसरीकडे माजी मंत्री अजित घोरपडेंनी शेतकरी आघाडी स्थापन करत तासगाव-कवठे महांकाळमधून लढण्याचं जाहीर केलंय.

कोण आहेत अजित घोरपडे?

अजित घोरपडे हे आर आर पाटलांच्या तालमीत तयार झालेले नेते आहेत. 1985 मध्ये काँग्रेसला आव्हान देत जनता पक्षातून निवडणूक लढवली होती. त्यांनी 1995 मध्ये अपक्ष निवडणूक जिंकली. युतीच्या सरकारमध्ये घोरपडेंना राज्यमंत्रिपद देण्यात आलं होतं. 1999 मध्ये पुन्हा अपक्ष म्हणून विजय झाले. आघाडी सरकारमध्ये 2 वेळा मंत्रिपदाची संधी त्यांना मिळाली. 2014 मध्ये भाजपामधून निवडणूक लढवूनही त्यांचा पराभव झाला.

दरम्यान, तासगाव-कवठे महांकाळमध्ये अंजनी आणि चिंचणीचं वर्चस्व राहिलंय. हे वर्चस्व मोडीत काढण्यासाठी आता अजित घोरपडेंनी तिसरी आघाडी स्थापन केलीय. त्यापार्श्वभूमीवर विशाल पाटलांनी घोरपडेंच्या पाठीशी राहण्याचा निर्धार केलाय.अजित घोरपडेंमुळे रोहित पाटलांची वाट बिकट होण्याची शक्यता आहे.