Miraj News : पुष्पा स्टाईल सुगंधी तंबाखूची वाहतूक; दोघांना अटक, ११ लाखांचा मुद्देमाल जप्त

सांगली : सांगलीच्या मिरजे मध्ये पुष्पा सिनेमा स्टाईल अवैध सुगंधी तंबाखूची वाहतुक करत विक्रीचा प्रकार पोलिसांनी उघडकीस आणला आहे. तब्बल एक लाखाच्या सुगंधी तंबाखूसह अकरा लाखांचा मुद्देमाल जप्त केला आहे. तिघांवर गुन्हे दाखल करत दोघांना अटक करण्यात आली आहे.

अंमली पदार्थ, तंबाखू, गुटखा वाहतूक व विक्रीस बंदी घालण्यात आली आहे. असे असताना देखील छुप्या पद्धतीने अंमली पदार्थांची वाहतूक करून त्याची सर्रास विक्री केली जात असते. पोलिसांकडून अनेकदा कारवाई केल्यानंतर देखील अंमली पदार्थांची वाहतूक व विक्री थांबत नाही. अशाच प्रकारे सांगली जिल्ह्यात सुगंधित तंबाखूची छुप्या पद्धतीने वाहतूक केली जात असल्याचे समोर आले आहे. यावर पोलिसांनी कारवाई केली आहे. 

पोलिसांची छापा टाकत कारवाई 
दरम्यान मिरजेतील नागपूर- रत्नागिरी महामार्गावरील निलजी बामणी दरम्यान पुलाखाली प्रतिबंधीत असणारा तंबाखूचा साठा ट्रकमधून खाली उतरवण्यात येत होता. याबाबत पोलिसांना माहिती मिळाल्यानंतर महात्मा गांधी चौकी पोलिसांनी छापा टाकत अवैध सुगंधी तंबाखूचा साठा जप्त करण्यात आला आहे. या कारवाईत साधारण १ लाख रुपये किंमतीचा सुगंधित तंबाखूचा साठा सापडला आहे. 

शेतीलाच्या पोत्यांआडून वाहतूक 

हा सुगंधित तंबाखूची वाहतूक पुष्पा चित्रपटातील दृश्याप्रमाणे लिंबू आणि इतर शेतीमालाच्या पोत्याच्या आडून केली जात होती. कर्नाटक मधून हा अवैध सुगंधी तंबाखू साठा मिरजेमध्ये आणण्यात आला होता. ही सर्व अवैध सुगंधी तंबाखू मिरज आणि कोल्हापूरच्या इचलकरंजी शहरात विक्री करण्यात येणार होता. यापूर्वीच पोलिसांनी कारवाई करत माल जप्त करत दोन जणांना ताब्यात घेतले आहे.