Sangli News: चक्क महाराजांना घ्यायला पाठविले हेलिकॉप्टर; किर्तनासाठी वेळ होत असल्याने आयोजकांचा पुढाकार

सांगली : सांगलीत सुरू असलेली रामकथा सोडून महाराजांना दोन तासांच्या आत पुण्यातील वाघोली (Wagholi) येथे कीर्तनासाठी येणे अशक्य होते. हे पाहून आयोजकांसह भाविकांनी पुढाकार घेत केज येथील कीर्तनकार समाधान महाराज शर्मा यांना ५५ मिनिटांत वाघोलीला हेलिकॉप्टरने आणत भाविकांना सुखद धक्का दिला आहे. (Live Marathi News)

केज (Kej) तालुक्यातील रामकथाकार, कीर्तनकार समाधान महाराज शर्मा यांची (Sangli) सांगली येथे रामकथा सुरू आहे. त्यांना पुण्यातील वाघोली येथे सुरू असलेल्या कीर्तन महोत्सवात गुरूवारी कीर्तनाचे निमंत्रण देण्यात आले होते. परंतु, सांगली ते वाघोली हे अंतर पाच तास १७ मिनिटांचे होते. शर्मा महाराज यांची गुरुवारची रामकथा सायंकाळी पाच वाजता संपणार होती. दोन तासांत महाराजांना कारने वाघोली येथे पोहोचणे आवश्यक होते.

मग पाठविले हेलिकॉप्‍टर

कारने हा प्रवास करण्यासाठी महाराजांना पाच तास लागणार होते. ही परिस्थिती लक्षात घेऊन महाराजांच्या कीर्तनासाठी आयोजक शांताराम खटके व भाविकांनी त्यांच्यासाठी थेट सांगली ते वाघोली अशी महालक्ष्मी कंपनीच्या हेलिकॉप्टरची व्यवस्था केली. त्यामुळे समाधान महाराज शर्मा हे केवळ ५५ मिनिटांत वाघोली येथे कीर्तनासाठी सायंकाळी पोहचले.