Miraj News : पाण्याच्या बॉटल बॉक्सच्या आडून बनावट दारूची तस्करी; मिरजेत राज्य उत्पादन शुल्क विभागाची कारवाई

सांगली : पिण्याच्या पाण्याच्या बॉक्सच्या आडून गोवा आणि मध्य प्रदेश बनावटीच्या दारूची तस्करी केली जात होती. या प्रकरणी पोलिसांनी कारवाई करत बनावट दारूची तस्करी रोखली आहे. राज्य उत्पादन शुल्क मिरज विभागाने कारवाई केली आहे. बियर, विस्की असे दारूचे बॉक्स आणि ट्रक असा एकूण ६८ लाख किमतीचा मुद्देमाल जप्त करण्यात आला आहे.

मद्य विक्री व वाहतूक करण्यास बंदी घालण्यात आली आहे. असे असताना देखील छुप्या पद्धतीने मद्याची वाहतूक केली जात आहे. इतकेच नाही तर बनावट दारूची तस्करी केल्याचे अनेकदा समोर आले आहे. त्यानुसारच सांगली जिल्ह्यातील मिरज येथे बनावट दारूची तस्करी केली जात असताना हि रोखण्यात पोलीस व राज्य उत्पादन शुल्क विभागाच्या पथकाला यश मिळाले आहे. 

सापळा रचून पकडला साठा 

राज्य उत्पादन शुल्क विभागाचे सांगलीचे राज्य उत्पादन शुल्क अधीक्षक प्रदीप पोटे, उप-अधीक्षक ऋषिकेश इंगळे यांच्या मार्गदर्शनाखाली व मिळालेल्या गुप्त माहितीगाराकडून गोवा व मध्यप्रदेशातील बनावट दारूची तस्करी केली जात असल्याची माहिती मिळाली होती. या माहितीच्या आधारे पथकाने मिरज- पंढरपूर राष्ट्रीय महामार्ग वरती सापळा लावुन कारवाई करण्यात आली. 

६८ लाखाचा मुद्देमाल हस्तगत 

गोवा आणि मध्य प्रदेश राज्य निर्मिती विदेशी मद्य भरलेला सहा चाकी ट्रक पकडण्यात आला. यामध्ये विविध ब्रँडचे विदेशी मद्याचे व बिअरचे एकूण ६५१ बॉक्स जप्त करण्यात आले. यात साधारण ३३ लाख रुपये किंमतीचा मद्यसाठा आणि सहा चाकी ट्रक असा एकूण ६८ लाख ४१ हजार २८० किमतीचा मुद्देमाल जप्त करण्यात आला. तसेच आरोपी जमीर अकबर मकानदार आणि शब्बीर अल्लाउद्दीन मकानदार यांना अटक करण्यात आलेली आहे.