Sangli Crime : खिशातून पैसे काढले, दारुच्या नशेत तरुणाने डोक्यात दगड घालून केला जिवलग मित्राचा खून

विजय पाटील, साम टीव्ही, प्रतिनिधी

Sangli : दारुच्या नशेत एकाने डोक्यात दगड घालून त्याच्या मित्राचा खून केला. खिशातून जबरदस्तीने पैसे काढून घेतल्याच्या कारणावरुन मित्रांमध्ये वाद झाला. यातून आरोपीने त्याच्या मित्राला ठार केल्याचे म्हटले जात आहे. हत्या केल्यानंतर आरोपी घटनास्थळावरुन पळाला आणि स्वत:हून पोलीस ठाण्यामध्ये हजर झाला. ही घटना सांगलीमध्ये घडली आहे.

मिळालेल्या माहितीनुसार, मयुर साठे (वय २४ वर्षे) असे मृत तरुणाचे नाव आहे, तर त्याची हत्या करणाऱ्या आरोपीचे नाव प्रताप चव्हाण (वय २४ वर्षे) आहे. मयुर हा वॉचमन म्हणून काम करतो. तो मीरज तालुक्यातील सोनि या गावामध्ये कुटुंबासह राहत होता. मयुर साठे आणि प्रताप चव्हाण हे दोघे लहानपणापासून मित्र होते, त्या दोघांनाही दारु पिण्याचे व्यसन होते.

बुधवारी (६ ऑगस्ट) मयुर आणि प्रताप दोघांनी दिवसभर सोबत हॉटेलमध्ये जोरदार पार्टी केली. ते दोघे प्रचंड दारु प्यायले. यादरम्यान मयुरने आरोपी प्रतापच्या खिशातून जबरदस्तीने पैसे काढण्याचा प्रयत्न केला. यावरुन दोघांमध्ये वाद झाला. रागातून आरोपीने बुधवारी मध्यरात्री कुपवाड औद्योगिक वसाहतीतील महावितरण कार्यालयाच्या बाजूला डोक्यात दगड घालून मयुरची हत्या केली.

मयुरला रक्ताच्या थारोळ्यामध्ये पडल्याचे दिसताच आरोपीने घटनास्थळावरुन पळ काढला. तो स्वत:हून पोलीस ठाण्यामध्ये हजर झाला. घटनेची माहिती मिळताच कुपवाड पोलीस घटनास्थळी पोहोचले. घटनास्थळाची पाहणी करुन आयुष हेल्पलाईन टीमच्या मदतीने मृतदेह रुग्णवाहिकेतून शवविच्छेदनासाठी पाठवण्यात आला आहे. पोलिसांनी आरोपीला ताब्यात घेतले आहे.