Sambhajinagar Water Crisis : हर्सूल तलावाने गाठला तळ; केवळ अडीच टक्के साठा शिल्लक

रामू ढाकणे 

छत्रपती संभाजीनगर : छत्रपती संभाजीनगरमधील जुन्या शहरातल्या अनेक वॉर्डांना पाणी पुरवठा करणाऱ्या हर्सूल तलावाने आता तळ गाठला आहे. त्यामुळे सध्या हर्सूल तलावात केवळ अडीच फूट इतकाच पाणीसाठा शिल्लक राहिला आहे. यामुळे आता पाणी टंचाईचा सामना या भागात करावा लागणार आहे.  

ऐन उन्हाळ्यातच शहरात तीव्र पाणी टंचाई (Water Scarcity) निर्माण झाली असल्याने शहरवासीयांची तहान भागविण्यासाठी महापालिका प्रशासनाकडून विविध उपाय योजना राबविण्यात येत आहेत. मात्र धरणात आणि तलावात अत्यंत कमी पाणीसाठा शिल्लक असल्यामुळे नागरिकांवर आता पाण्यासाठी भटकंती करण्याची वेळ येत आहे. तर दुसरीकडे शहराला पाणीपुरवठा करणाऱ्या जायकवाडी धरणातही (Jayakwadi Dam) उपयुक्त पाणीसाठा हा केवळ ६.१२ टक्क्यावर आला असल्याने ग्रामीण भागात देखील याचे परिणाम पाहायला मिळत आहे.

संभाजीनगर (Sambhajinagar) शहरातील जुन्या भागात पाणी पुरवठा होत असलेल्या हर्सूल तलावाच्या पाण्यावर तहान भागविल्या जाणाऱ्या शहरातील १४ वार्डावर पाणी संकट निर्माण झाले आहे. शहागंज येथील जलकुंभातून १४ वार्डांना पाणी पुरवठा केला जात असल्याने पाण्यासाठी कसरत करण्याची वेळ आता मनपावर आली आहे.