Sambhajinagar : एमडी ड्रग्स प्रकरणातील आरोपीला व्हीआयपी वागणूक, बिर्याणी देणे पडले महागात; ३ कर्मचाऱ्याचे निलंबन

छत्रपती संभाजीनगर : संभाजीनगरच्या वाळूज एमआयडीसी परिसरात सव्वा कोटी रुपयांचा एमडी ड्रग्सचा साठा सापडून आला होता. या प्रकरणी पोलिसांनी कारवाई करत दोन गोदाम सील केली होती. तर या गंभीर गुन्ह्यातील मुख्य आरोपीना पोलिसांकडून व्हीआयपी वागणूक देत खाण्यास बिर्याणी देण्यात आली होती. मात्र हि बिर्याणी देणे एनडीपीएसच्या  कर्मचाऱ्यांना चांगलेच महागात पडले असून तीन जणांना निलंबित करण्यात आले आहे. 

छत्रपती संभाजीनगरच्या वाळूज एमआयडीसी परिसरात एनडीपीएस पथक आणि वाळूज एमआयडीसी पोलिसांच्या संयुक्त पथकाने दोन दिवसांपूर्वी अमली पदार्थ प्रतिबंधक पथकाने भंगार व्यावसायिकांच्या गोडाऊनवर छापे टाकले. या कारवाईत साधारण दीड किलो एमडी ड्रग्स ज्याची किंमत सव्वा कोटीच्या घरात आहे. हा संपूर्ण मुद्देमाल जप्त करत दोन गोडावून सील करण्यात आले होते. तर तीन जणांना ताब्यात घेतले होते.

आरोपीला दिली बिर्याणी 

छत्रपती संभाजीनगरच्या वाळुज एमआयडीसी पोलीस ठाण्यामध्ये गंभीर गुन्ह्यातील आरोपींना पोलीस अधिकाऱ्यांनी व कर्मचारी व्हीआयपी ट्रीटमेंट देत होते. इतकेच नाही तर त्यांना बिर्याणी पुरवत असल्याचा व्हिडिओ देखील समोर आला होता. या या प्रकाराचा व्हिडीओ साम टीव्हीने दाखवल्यानंतर पोलीस प्रशासन खळबळून जागे झाले असून याची गंभीर दखल घेण्यात आली आहे. 

तिघांवर निलंबनाची कारवाई 

पोलीस या गंभीर गुन्ह्यातील तीन आरोपी आणि त्याचे मित्र चिकन तंगडीची पार्टी करत असल्याचे दिसून येत आहे. याची बातमी साम टीव्हीने प्रसारित केल्यानंतर याप्रकरणी तीन कर्मचाऱ्यांना जबाबदार धरत त्यांच्यावर निलंबनाची कारवाई करण्यात आली आहे. मात्र या  तीन कर्मचाऱ्यांच्या पाठीशी घालणाऱ्या अधिकाऱ्यांवर अद्याप कारवाई झालेली नाही.