Sambhajinagar News: बालविवाह केलेल्या मुलीचे अडीच महिन्यात टोकाचे पाऊल; पतीनेही महिनाभरापुर्वीच केली आत्महत्या

नवनीत तापडीया

छ्त्रपती संभाजीनगर : चौदाव्या वर्षी बालविवाह लावलेल्या मुलीसह तिच्या पतीने अडीच महिन्यातच वेगवेगळ्या कारणावरून (Sambhajinagar) जीवन संपविल्याची धक्कादायक घटना समोर आली आहे. महिनाभरापूर्वी पतीने आत्महत्या केली होती. सोमवारी (१९ जून) रात्री पत्नीने गळफास घेतला. नारेगावमध्ये ही घटना घडली. या प्रकरणी एमआयडीसी सिडको (Cidco) ठाण्यात नोंद करण्यात आली आहे. (Maharashtra News)

एमआयडीसी सिडको पोलिसांकडून मिळालेल्या माहितीनुसार नारेगावातील आनंद गाडेनगरात राहणाऱ्या मुलीला लहान तीन भाऊ आहेत. तर तिचे आई-वडील वीटभट्टीवर काम करतात. अडीच महिन्यांपूर्वी तिच्‍या वडीलांनी एका तरुणासोबत मुलीचे लग्न लावून दिले. लग्नानंतर अवघ्या दीड महिन्यातच पतीने आत्महत्या केली. पोलिसांना (Police) त्याचे नेमके कारण अद्याप समजलेले नाही.

घरात एकटी असताना टोकाचे पाऊल

दरम्यान अवघ्या १४ व्या वर्षी लग्न त्यानंतर दीड महिन्यात पतीची आत्महत्या. यामुळे तिच्‍यावर दु:खाचा डोंगर कोसळला. त्यावर ती आई- वडिलांकडे राहू लागली. सोमवारी काम असल्याने आई-वडील बाहेर गेले होते. ते उशिरापर्यंत घरी आले नाहीत. या दरम्यान, मुलीने पत्र्याच्या खोलीत गळफास घेऊन आत्महत्या केली. हा प्रकार तिच्या भावाच्या लक्षात आल्‍यानंतर त्यांनी दरवाजा तोडून तिला दवाखान्यात दाखल केले. मात्र, डॉक्टरांनी तपासून तिला मृत घोषित केले.

बालविवाह समजला कसा नाही?

बाल कल्याण समिती, चाईल्ड हेल्प लाइन आणि पोलिसांच्या मदतीने शहर व जिल्ह्यात अनेक बालविवाह (Child Marriage) रोखले आहेत. मात्र, अडीच महिन्यापूर्वी लावण्यात आलेला विवाह यापैकी कोणत्याच यंत्रणेला समजला कसा नाही? असा सवाल आता उपस्थित केला जात आहे. धक्कादायक म्हणजे, महिनाभरापूर्वी सदर मुलीच्या पतीने आत्महत्या केल्यानंतरही ही बाब समोर कशी आली नाही? हेही कोडेच आहे.