Sambhajinagar : पाण्याच्या प्रवाहात नदीत मधोमध अडकली कार; भाविकांचा जीव टांगणीला, सुखरूप बाहेर काढण्यात यश

छत्रपती संभाजीनगर : राज्यात सर्वदूर जोरदार पाऊस सुरु आहे. या पावसामुळे नदी, नाले तुडुंब भरून वाहत आहेत. अशात रुद्रेश्वर येथे श्रावण सोमवार निमित्ताने दर्शनासाठी गेलेल्या भाविकांची कार नदीच्या पुराच्या पाण्यात अडकली होती. यामुळे भाविकांचा जीव मुठीत अडकला होता. मात्र या साठी भाविकांना सुखरूप बाहेर काढण्यात यश मिळाले आहे.

छत्रपती संभाजीनगर जिल्ह्यातील सोयगाव जवळील वेताळवाडीतील ग्रामस्थांनी नदीत उतरून नदीच्या पुरातील सात पर्यटकांना बाहेर काढले. रुद्रेश्वर येथे पर्यट आणि श्रावण सोमवारनिमित्त आलेल्या सिल्लोड तालुक्यातील सात पर्यटक वाहनासह वेताळवाडी नदीच्या पुरात अडकले होते. ही घटना सोमवारी दुपारी दोन ते अडीचच्या दरम्यान घडली. सिल्लोड तालुक्यातील उंडणगाव येथील सात प्रवासी वाहनाने रुद्रेश्वरला आले होते. 

अचानक पाण्याचा प्रवाह वाढला 

दरम्यान दुपारी रुद्रेश्वर लेणी पाहून ते घरी परतताना वेताळवाडी नदीला पावसामुळे आलेल्या पुराच्या पाण्यात चालकाने वाहन घातले. मात्र नदीच्या मधोमध गाडी गेल्यानंतर कार बंद पडल्याने नदीत अडकली होती. यावेळी पुराचा प्रवाह कमी होता. परंतु, वाहन नदीपात्रात मध्यभागी असताना अचानक पुराच्या पाण्याचा प्रवाह वाढला. यावेळी चालकासह प्रवासी गांगरले होते. हा प्रकार नदीजवळ असलेले वेताळवाडीचे पोलिस पाटील श्रीराम जाधव यांच्या लक्षात आला. 

तरुणांनी पाण्यात उड्या मारत काढले बाहेर 

पोलीस पाटील जाधव यांनी गावात माहिती दिल्यानंतर त्यांच्यासह गावातील इसाक शहा, आयुब शहा, आरिफ खान, माजित खाँ मेवाती, गुफरान पठाण, कालू हुसेन मेवती यांच्यासह दहा ते बारा पोहणाऱ्या तरुणांनी पुराच्या पाण्यात उड्या टाकल्या. नागरिकांनी वाहन पाण्यातून ढकलत नदीच्या काठावर आणले. त्यातील तीन पुरुष व चार महिलांना सुखरूप बाहेर काढले. यानंतर ट्रॅक्टरच्या साहाय्याने ट्रॅक्टर मालक सत्तार खान मेवाती यांनी पुरातील अडकलेले वाहन पाण्याच्या बाहेर काढले.