Sambhajinagar Accident: छत्रपती संभाजीनगरमध्ये भरधाव पिकअपची दुचाकीला धडक; 'फ्रेंडशिप डे'च्या दिवशीच जिवलग मित्रांचा मृत्यू

रामनाथ ढाकणे, संभाजीनगर

छत्रपती संभाजीनगरमध्ये भीषण अपघाताची (Sambhajinagar Accident) घटना घडलीये. दुचाकी आणि पिकअपमध्ये धडक होऊन अपघात झाला. या अपघातामध्ये दोन तरुणांचा जागीच मृत्यू झाला. हे देघेही जीवलग मित्र होते. कन्नड-भराडी रोडवरील बोरगाव बाजार फाट्याजवळ हा अपघात झाला. या अपघाताचा तपास संभाजीनगर पोलिसांकडून सुरू आहे.

मिळालेल्या माहितीनुसार, छत्रपती संभाजीनगर जिल्ह्यातील कन्नड- भराडी रोडवर असणाऱ्या बोरगावजवळ भीषण अपघात झाला. दुचाकी आणि पिकपचा भीषण अपघात झाला. या अपघातात दुचाकीवरून जाणाऱ्या २ तरुणांचा जागीच मृत्यू झाला. हे दोघेही खूप चांगले मित्र होते. मैत्री दिनाच्या दिवशीच ही घटना घडल्यामुळे हळहळ व्यक्त केली जात आहे.

गणेश निकम आणि आशिष परमेश्वर अशी या जीवलग मित्रांची नावं आहेत. दोघेही कन्नडकडून भराडीच्या दिशेने जात होते. त्याचवेळी एका भरधाव पिकअपला त्यांच्या दुचाकीने धडक दिली. पिकअप चालकाने अचानक ब्रेक दाबला. त्यावेळी पाठीमागून वेगामध्ये आलेल्या गणेश आणि आशिषची दुचाकी पिकअपवर जोरदार आदळली.

हा अपघात इतका भीषण होता की गणेश निकम आणि आशिष परमेश्वर जमिनीवर जोरात आदळले. अपघातामध्ये गंभीर जखमी झालेल्या दोघांचाही जागीच मृत्यू झाला. मैत्री दिनाच्या दिवशीच दोन जीवलग मित्रांनी आपले प्राण गमावल्यामुळे हळहळ व्यक्त केली जात आहे. गणेश आणि आशिष यांच्या कुटुंबींना मोठा धक्का बसला. तर दोघे राहत असलेल्या गावांवर दु:खाचा डोंगर कोसळला आहे. सध्या संभाजीनगर पोलिस या अपघाताचा तपास करत आहेत.