Maharashtra Politics: कोल्हापूरच्या आखाड्यात शरद पवारांचा 'डाव', समरजित देतील मुश्रीफ यांना आव्हान, काय आहे राजकीय समीकरण?

शरद पवारांनी आगामी विधानसभेसाठी आपलं लक्ष पश्चिम महाराष्ट्रावर केंद्रित केलंय. पवारांनी आधी भाजपला धक्का दिल्यानंतर त्यांनी आपला मोर्चा आता अजित पवारांच्या राष्ट्रवादीकडे वळवलाय. पवारांच्या कोल्हापूरच्या दौऱ्यात अजित पवारांच्या राष्ट्रवादीचे माजी आमदार के पी पाटील आणि जिल्हाध्यक्ष ए वाय पाटील यांनी पवारांची भेट घेतली. त्यामुळे भाजपनंतर आता अजितदादांच्या राष्ट्रवादीलाही खिंडार पडणार असल्याचं दिसतंय.

आगामी विधानसभेच्या दृष्टीनं शरद पवारांनी पश्चिम महाराष्ट्रात आधीच मोहरे हलवण्यास सुरुवात केली. समरजित घाटगेंची नाराजी ओळखून पवारांनी घाटगेंना आपल्या तंबूत घेतलं. पवारांच्या उपस्थितीत घाटगेंनी राष्ट्रवादीत प्रवेश केला. आता घाटगेंनतर भाजपचे माजी जिल्हाध्यक्ष राहूल देसाईही तुतारी फुंकणार असल्याचं दिसतंय. मात्र सर्वाधिक चर्चा आहे ती फडणवीसांचे निकटवर्तीय समरजित घाटगेंची. घाटगेंनी भाजप का सोडलं ते जाणून घेऊ...

समरजित घाटगेंनी भाजप का सोडलं?

- कागलमध्ये मुश्रीफ आणि घाटगे पारंपरिक प्रतिस्पर्धी

- अजित पवारांसोबत मुश्रीफही सत्तेत आल्यानं कागलचा तिढा

- कागलमधून मुश्रीफच महायुतीचे उमेदवार असण्याची शक्यता

- भाजपला जागा सुटणार नसल्यानं घाटगेंची अडचण

- गेल्यावेळी अपक्ष लढून 88 हजार मतं मिळाल्यानं आता चिन्हावर लढण्याची तयारी

आगामी विधानसभेसाठी पवारांनी आपला मोर्चा पश्चिम महाराष्ट्राकडे वळवलाय. एकाच दगडात त्यांनी भाजप आणि अजित पवारांच्या राष्ट्रवादीवर निशाणा साधलाय. के पी पाटील गेल्या निवडणुकीत राष्ट्रवादीकडून राधानगरीतून रिंगणात होते. मात्र त्यांचा पराभव झाला. त्यांनी अजितदादांसोबत जाणं पसंत केलं.

मात्र आता त्यांनी पवारांची भेट घेतल्यामुळे त्यांच्याबाबत चर्चा सुरू झालीय. तर त्यांचे प्रतिस्पर्धी ए वाय पाटीलही राधानगरीतून इच्छुक असल्यामुळे त्यांनी तर थेट पवारांच्या कार्यक्रमातच हजेरी लावून उमेदवारीवर दावा ठोकलाय. त्यामुळे पवार कुणाच्या हातात तुतारी देतात याची उत्सुकता आहे. पश्चिम महाराष्ट्र हा राष्ट्रवादीचा बालेकिल्ला राहीलाय. राष्ट्रवादीतील फुटीनंतर काही आमदार अजित पवारांसोबत गेल्यानं राजकीय समीकरणं बदलली होती. मात्र आता खुद्द शरद पवारांनी आखाड्यात उतरुन डाव टाकल्याचं दिसतंय.