Maharashtra Politics : नवरी पसंत, पण नवरदेवाला हुंडा पाहिजे; शपथविधीवरून रोहित पवारांचा महायुतीला अप्रत्यक्ष टोला

सुशील थोरात, साम टीव्ही

अहिल्यानगर : विधानसभा निवडणुकीत अभूतपूर्व यश मिळाल्यानंतर महायुतीकडून सत्तास्थापनेची हालचाली सुरु झाल्या आहेत. गेल्या काही दिवसांपासून सत्तावाटपावर बैठकांचा सपाटा सुरु होता. त्यानंतर काल शनिवारी भाजपने शपथविधीचा तारीख जाहीर केली. मात्र, तरीही सत्तावाटपातील मु्ख्यमंत्री शिंदे यांची नाराजी दूर झाली नसल्याची चर्चा आहे. यावरून रोहित पवार यांनी महायुतीला लक्ष्य केलं आहे. 'नवरी पसंत आहे. पण नवरदेवाला हुंडा पाहिजे, अशा शब्दात शरद पवार गटाचे आमदार रोहित पवार यांनी महायुतीला अप्रत्यक्ष टोला लगावला आहे.

शेवगाव पाथर्डी मतदारसंघातील शरद पवार पक्षाचे पराभूत उमेदवार प्रताप ढाकणे यांनी जाहीर आभार मेळाव्याचे आयोजन केले होते. या मेळाव्याला आमदार रोहित पवार,खासदार निलेश लंके यांच्या पत्नी राणी लंके उपस्थित होत्या. या कार्यक्रमानंतर आमदार रोहित पवार यांनी सत्ता स्थापनेला होणाऱ्या विलंबावरून महायुतीला टोला लगावला आहे. भाजपने शपथविधीची तारीख जाहीर केली आहे. मात्र, मुख्यमंत्री कोण होणार, हा प्रश्न गुलदस्त्यात आहे. याबाबत बोलताना रोहित पवारांनी महायुतीवर टीका केली.

'२६ तारखेला सर्व पार पाडायचं होतं. त्यानंतर २९ तारीख आली. पुढे २ तारीख आली. आता ५ तारीख फायनल झाली आहे. आता हे म्हणजे असं झालं आहे. नवरदेवाला नवरी पसंत आहे. लग्न ठरलं आहे. पण लग्नाची तारीख आली. आता नवरदेव रुसून बसला आहे की, मला हुंडा पाहिजे म्हणजेच मला पद पाहिजे, असी महायुतीची अवस्था झाली आहे, अशा शब्दात रोहित पवारांनी महायुतीवर तोफ डागली.

ईव्हीएम मशीनवर बोलताना शरद पवार म्हणाले, 'शरद पवार पक्षाच्या वतीने ईव्हीएम मशीनबाबत निवडणूक आयोगाच्या आयुक्ताकडे मागणी करणार आहे. सुप्रीम कोर्टाने निवडणूक आयुक्ताला सांगितले होते की, मॉक करायचा नाही. जिथं मतदान झाले, त्यातीलच एक ईव्हीएम घ्यायचं आणि त्याचं रिटेंशटिंग करायचं'.

'रिटेंशटिंगपेक्षा व्हीव्हीपॅट तिथं मोजायचे हे सुप्रीम कोर्टाने सांगितलं होतं. पण तिथं इलेक्शन कमिशनने वेगळेच केलं ,असं रोहित पवार यांनी म्हटलं आहे. यासंदर्भात इलेक्शन कमिशनकडे जाऊन त्यांची भेट घेऊ. जर त्यांनी ऐकलं नाही, तर सुप्रीम कोर्टात दाद मागणार असल्याच देखील रोहित पवार म्हटलंय.