रॅपिडो कंपनीला धमकावून एका इव्हेंटसाठी कोटींची स्पॉन्सरशिप घेतली, असा आरोप राष्ट्रवादी काँग्रेस अजित पवार गटाचे आमदार रोहित पवार यांनी परिवहन मंत्री प्रताप सरनाईक यांच्यावर केला आहे. 'इव्हेंट करण्यास विरोध नाही, रॅपिडो कंपनीला तुम्ही पकडता, परवानगी नसताना महाराष्ट्रात काम करत होती. मीडिया कव्हरेज होतं. तुम्ही फेमस होता. २-३ महिन्यानंतर त्याच कंपनीला तुमच्या एका इव्हेंटला मोठी स्पॉन्सरशिप द्यायला लावली जाते. तुम्ही ज्या पदावर आहात त्या पदाचा वापर करून कंपनीला धमकावलं. धमकावल्यानंतर त्या कंपनीशी वाटाघाटी केली. त्यानंतर काही कोटींची स्पॉन्सरशिप घेतली.', असा गंभीर आरोप परिवहन मंत्री प्रताप सरनाईक यांच्यावर रोहित पवार यांनी केला.
रोहित पवार यांनी उद्धव ठाकरे यांच्याबाबत प्रतिक्रिया देताना सांगितले की, 'उद्धव ठाकरेसाहेब मोठे नेते आहेत. कार्यकर्त्यांना काही प्रमाणात वाईट वाटू शकते. पण उद्धव ठाकरे हे काहीही त्यावर अजून बोलले नाही. उद्धव ठाकरे हे विचाराला पक्के आहे. भाजप ज्याप्रमाणे देश आणि राज्य सरकार चालवत आहे त्यामुळे सामान्य लोकांचं वाटोळ या धोरणामुळे होत आहे. त्यासाठीच भाजपच्या विरोधात लढायला उद्धव ठाकरे हे आघाडी बरोबर लढायला तयार आहे. ह्या ज्या छोट्या मोठ्या गोष्टी होत असतात हे मोठे नेते मनाला कधी लावून घेत नाहीत. मोठ्या नेत्यांचं मन मोठं असतं ती विचाराची लढाई असते. कार्यकर्त्याला कितीही वाईट वाटलं पण नेत्याला कधी वाईट वाटत नाही असं आम्हाला सगळ्यांना वाटतं.'
एकनाथ शिंदे फॅमिली इन्कम टॅक्स नोटीससंदर्भात प्रतिक्रिया देताना रोहित पवार म्हणाले की, 'शिंदेंना ईडीची नोटीस नाहीतर इन्कम टॅक्सची नोटीस आली असं मला म्हणायचं होतं. कदाचित मी जर ईडी म्हटलं असेल तर थोडं कन्फ्युजन झालं. मात्र त्यांच्या अनेक नेत्यांना इन्कम टॅक्स नोटीस आलेले आहेत हे मात्र खरं आहे.' यावेळी रोहित पवार यांनी रुपाली चाकणकर यांनी प्रांजल खेवलकर यांच्यासंदर्भात केलेल्या आरोपांवर देखील त्यांनी प्रतिक्रिया दिली.
रोहित पवार म्हणाले की, 'रूपालीताईंना विनंती आहे की त्यांनी याबाबतीत आक्रमक झाला आहात तर हगवणे प्रकरण आणि ज्ञानेश्वरी मुंडे ह्या सुद्धा दोन वर्षे न्याय मागण्यासाठी प्रयत्न करतायेत. आत्मदहन करण्याचा प्रयत्न करतायेत. त्यावेळी मात्र महिला आयोगाच्या अध्यक्षांनी कुठेही भूमिका घेतली नाही. हे दुर्दैव आहे. प्रांजल खेवलकरने जर काही चूक केली असेल त्याबाबतीत जी कारवाई करायची ती करावी. मात्र खडसेसाहेबांनी सरकारच्या विरोधात बोलायला सुरुवात केल्यानंतर त्यांच्या जावयाला सेटअपमध्ये अडवण्याचा प्रयत्न केला अशी भूमिका ही खडसे परिवाराची आणि आमची आहे.'
सकाळ+चे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Marathi news and watch Live TV. Breaking news from Maharashtra, India, Pune, Mumbai, Politics, Entertainment, Sports, Lifestyle at SaamTV. Get Live Marathi news on Mobile. Download the Saam Tv app for Android and IOS.