रवी राणा मातोश्रीवर करणार हनुमान चालीसा पठण; मुंबईचं तिकिट केलं बुक

अमर घटारे -

अमरावती : मुख्यमंत्री उद्धव ठाकरे (Uddhav Thackeray) यांनी मातोश्रीवर हनुमान चालीसा म्हणावी नाही तर मी मातोश्री वर हनुमान चालीसा म्हणू असा इशारा आमदार रवी राणा यांनी दिला होता. याच पार्श्वभूमीवर आता त्यांनी मातोश्रीवर जाण्याची तयारी सुरु केली आहे. रवी राणा (Ravi Rana) यांनी केलेल्या वक्तव्यानुसार ते आता मातोश्रीवर जाण्यासाठी सज्ज झाले असून मुंबईला जायची तारीख देखील ठरवली आहे.

येत्या २२ एप्रिल रोजी आपण मातोश्रीवर (Matoshri) जाऊन हनुमान चालीसाचे पठण करणार असून त्यासाठी मुंबईला जायचं तिकीट देखील बुक केल्याची माहीती आमदार रवी राणा यांनी दिली आहे.

हनुमान जयंतीपासून मुख्यमंत्री उद्धव ठाकरे यांच्या मातोश्री या निवासस्थानकावर जाऊन हनुमान चालीसा (Hanuman Chalisa) पठण करणार असल्याचं वक्तव्य अपक्ष आमदार रवी राणा यांनी केलं होतं. राणा यांच्या आव्हानानंतर शिवसेनेने (Shivsena) देखील आक्रमक पवित्रा घेतला होता. धार्मिक तेढ पसरवून दंगल माजवायची आहे का?, असा प्रश्न मुंबईच्या माजी महापौर किशोरी पेडणेकर यांनी राणा यांना विचारला होता. तर राणा दाम्पत्यांच्या घरासमोर शिवसैनिकांनी निदर्शने देखील केली होती.

Edited By - Jagdish Patil