देशाचा पुढचा पंतप्रधान कोण? पुण्यातील चौकाचौकात झळकले बॅनर; राजकीय वर्तुळात चर्चांना उधाण

आगामी काळात देशात सत्ताबदल नक्की होणार आहे. मात्र हा बदल काँग्रेसमुळे किंवा कोणत्याही एका राजकीय पक्षामुळे होणार नाही, तर गेल्या 12 वर्षांतील पंतप्रधान नरेंद्र मोदींच्या कारभारामुळेच सत्ताबदलाची परिस्थिती निर्माण होईल, असा दावा राज्याचे माजी मुख्यमंत्री आणि काँग्रेसचे ज्येष्ठ नेते पृथ्वीराज चव्हाण यांनी केलाय. त्याचदरम्यान पुण्यात देशाच्या भावी पंतप्रधान कोण होणार याचे बॅनर लावण्यात आलेत.

हिंदुस्थानचे भावी पंतप्रधान

लोकसभेचे विरोधी पक्षनेते खासदार राहुल गांधी हे उद्या पुणे दौऱ्यावर येणार आहेत. या पार्श्वभूमीवर शहरामध्ये स्वागताचे बॅनर लावण्यात आलेत. पुण्यातील शास्त्री रोडसह विविध भागांमध्ये राहुल गांधींचा हिंदुस्तानचे भावी पंतप्रधान असा उल्लेख केलेले बॅनरवर लावण्यात आलेत.

राहुल गांधी यांचा भावी पंतप्रधान असा उल्लेख या सर्व बॅनर्सवर करण्यात आलेला आहे, पुण्यामध्ये ही बॅनरबाजी करण्यात आलेली आहे. 'छात्रो की गुंज' या कार्यक्रमाच्या अंतर्गत राहुल गांधी पुण्यामध्ये कार्यक्रमासाठी उपस्थित राहणार आहेत आणि त्यांच्या स्वागतासाठी हे बॅनर्स लावण्यात आलेत.

नगरसेवक- पदाधिकाऱ्यांच्या भेटीचा कार्यक्रम

राहुल गांधी पुणे दौऱ्यावर महानगरपालिकेतील नगरसेवकांची भेट घेणार आहेत. दरम्यान छात्र के गुंज कार्यक्रम जरी राजकीय नसला तरी राहुल गांधी शहरातील पदाधिकाऱ्यांची भेट घेणार आहेत. राहुल गांधी छात्र के गुंज कार्यक्रमात महिलांची संवाद साधणार आहेत, त्याचवेळी ते काँग्रेस पदाधिकाऱ्यांची भेट घेणार आहेत.

देशात सत्ताबदल नक्की होणार

राज्याचे माजी मुख्यमंत्री आणि काँग्रेसचे ज्येष्ठ नेते पृथ्वीराज चव्हाण यांनी देशात सत्ताबदल होणार असल्याचा दावा केलाय. 2029 मध्ये नरेंद्र मोदी पंतप्रधान होणार नाहीत. त्यामुळे भाजपकडून आतापासूनच पुढील नेतृत्वाचा चेहरा बदलण्याचे प्रयत्न सुरू झालेत. देशातील राजकीय परिस्थिती वेगाने बदलत असून आगामी काळातील नेतृत्वावर चर्चा सुरू असल्याचा दावा त्यांनी केलाय.