Pune-Solapur Road: पुणे-सोलापूर मार्गावर आज वाहतुकीत बदल, 'या' पर्यायी मार्गाचा करा वापर

सचिन जाधव, पुणे

पुणे-सोलापूर मार्गावरून प्रवास करणाऱ्यांसाठी महत्वाची बातमी आहे. पुणे-सोलापूर मार्गावरील वाहतुकीमध्ये बदल करण्यात आले आहेत.या मार्गावर जलवाहिनी टाकण्याचे काम केले जाणार आहे. त्यामुळे वाहतुकीमध्ये बदल करण्यात आले आहेत. आज या मार्गावरून प्रवास करताना प्रवाशांना वाहतुक कोंडीचा त्रास सहन करावा लागणार आहे. त्यामुळे पुणे वाहतूक पोलिसांनी या मार्गावरील वाहतुकीमध्ये काही बदल केले आहेत.

पुणे-सोलापूर रस्त्यावरील मम्मादेवी चौक ते अर्जुन रस्ता टी जंक्शन दरम्यान एम. पी. पेट्रोल पंपाजवळ जलवाहिनी टाकण्यात येणार आहे. शुक्रवारी रात्री आठ वाजल्यापासून हे काम सुरू होणार आहे. त्यासाठी पुणे-सोलापूर मार्गावरील वाहतुकीमध्ये बदल करण्यात आले आहेत. त्यामुळे या कामाच्या दरम्यान पुणे-सोलापूर मार्गावरील प्रवास करताना प्रवाशांनी वाहतूक पोलिसांनी दिलेल्या पर्यायी मार्गाचा वापर करावा असे आवाहन करण्यात येत आहे.

पुणे -सोलापूर मार्गावरील वाहतुकीमध्ये बदल करण्यात आल्याची प्रवाशांनी नोंद घ्यावी. सोलापूरकडून स्वारगेटला जाणारी वाहतूक सरळ अर्जुन रस्ता, मम्मादेवी चौकमार्गे स्वारगेटकडे जाईल. त्यामध्ये कोणताही बदल नाही. स्वारगेटकडून सोलापूरकडे जाणाऱ्या वाहनांना मम्मादेवी चौकात सरळ जाण्यास बंदी आहे. ही वाहने डावीकडे वळून बिशप सर्कल येथून उजवीकडे वळून सोलापूर रस्त्याला जातील. हा सर्व मार्ग एकेरी करण्यात येत आहे.

सोलापूरवरून येणाऱ्या वाहनांना बंदी असून सदर वाहने ही सरळ मम्मादेवी चौक, गोळीबार चौकमार्गे इच्छित स्थळी जातील. डॉ. कोयाजी रस्त्याने येणारी वाहने हरप्रीत मंदिर चौकात उजवीकडे वळून खाणे मारुती चौक, पूलगेट बस स्थानकामार्गे कोंढव्याला जातील. सोलापूरकडून येणाऱ्या वाहनांना मम्मादेवी चौकात उजवीकडे वळण्यास बंदी आहे. ही वाहने गोळीबार चौकातून सरळ आल्यावर उजवीकडे वळून लष्करमार्गे इच्छित स्थळी जातील.