Beed : नसरापूर बालिकेवरील बलात्कार प्रकरणाचे बीडमध्ये पडसाद; संतप्त जमावानं रोखला महामार्ग, वाहतूक ठप्प

पुण्यातील भोर तालुक्यात ४ वर्षाच्या मुलीवर अमानुष अत्याचार करून तिची हत्या करण्यात आली. जिल्ह्याला हादरवून सोडणाऱ्या भीषण घटनेच्या निषेधार्थ संपूर्ण राज्यभर संतापाची लाट उसळली असून, त्याचे तीव्र पडसाद परळीत उमटले आहेत. बीड जिल्ह्यातील परळी वैजनाथ येथे आज (४ मे) संतप्त नागरिकांचा प्रचंड उद्रेक पाहायला मिळाला.शहरातील प्रमुख केंद्र असलेल्या छत्रपती संभाजी महाराज चौकात नागरिकांनी एकत्र येत जोरदार ‘रास्ता रोको’ आंदोलन छेडले. यामुळे महामार्गावरील वाहतूक ठप्प झाली आहे.

आंदोलनाचे वैशिष्ट्य म्हणजे महिलांचा उत्स्फूर्त सहभाग पहायला मिळाला पुण्यातील घटनेचा निषेध करताना महिलांनी अत्यंत आक्रमक पवित्रा घेत "दोषींना तात्काळ फाशीचीच शिक्षा द्या" अशा घोषणांनी परिसर दणाणून गेला आहे. महिलांसोबतच पुरुष आणि तरुणांनीही उपस्थित राहून प्रशासनाचा निषेध केला. रास्ता रोको आंदोलनामुळे काही काळ शहरातील मुख्य मार्ग आणि महामार्गावरील वाहतूक पूर्णपणे विस्कळीत झाली होती. वाहनांच्या लांबच लांब रांगा लागल्याचे चित्र पाहायला मिळाले. परिस्थितीचे गांभीर्य ओळखून पोलिस प्रशासनाने तत्काळ मोठा बंदोबस्त तैनात केला होता. आंदोलन शांततेत पार पडावे आणि कोणताही अनुचित प्रकार घडू नये यासाठी पोलीस सतर्क होते.

आंदोलकांनी आपल्या भावना व्यक्त करताना सांगितले की, "ही घटना माणुसकीला लज्जास्पद आहे. जोपर्यंत या प्रकरणातील नराधमांना कठोर कायदेशीर शासन होत नाही, तोपर्यंत जनभावना शांत होणार नाहीत." तसेच, न्याय मिळेपर्यंत हा लढा अधिक तीव्र करण्याचा इशाराही यावेळी नागरिकांनी दिला.

दरम्यान, या घटनेमुळे महिलांच्या सुरक्षेचा प्रश्न पुन्हा एकदा ऐरणीवर आला आहे. नागरिकांमध्ये असुरक्षिततेची भावना वाढीस लागली असून, सरकारने तातडीने कठोर पावले उचलावीत, अशी मागणी जोर धरू लागली आहे. परळीतील या आंदोलनामुळे प्रशासनावर दबाव वाढला असून, पुढील काही दिवसांत या प्रकरणात महत्त्वपूर्ण घडामोडी होण्याची शक्यता वर्तवली जात आहे