Pune News: रात्रीच्या अंधारात घराबाहेर पडला अन् विहिरीत उडी घेतली; पुण्यातील घटनेनं खळबळ

अक्षय बडवे

Pune Crime News:

पुण्यातील बाणेर येथे एक खळबळजनक घटना घडली आहे. कळमकर चौकामधील विहिरीत एका तरुणाने उडी मारून आपलं जीवन संपलंय. स्वप्निल राऊत असं आत्महत्या केलेल्या युवकाचं नाव आहे. या आत्महत्येमागे मानसिक आजार आणि घरगुती वाद असण्याची शक्यता पोलिसांकडून व्यक्त करण्यात आली आहे.

मिळालेल्या माहितीनुसार, ३ नोव्हेंबर रोजी रात्री १२.३० च्या दरम्यान ही घटना घडली आहे.स्वप्नील मूळचा बुलढाणा जिल्ह्याचा आहे. रात्री जेवण झाल्यानंतर घरातील सगळे झोपल्यावर या तरुणाने घरातून थेट विहीर गाठली आणि उडी मारली. दुसऱ्या दिवशी सकाळी घरातील मंडळींना तरुण दिसला नाही.

त्यामुळे कुटुंबियांनी त्याचा शोध घेण्यास सुरूवात केली. पण त्याचा पत्ता लागला नाही. त्यामुळे विहिरी शेजारच्या सीसीटीव्ही कॅमेराचे फुटेज तपासण्यात आले. त्यावेळी तरुणाने स्वतः विहिरीत उडी मारल्याचे सीसीटीव्ही कॅमेऱ्यात दिसले. फुटेज पाहिल्यावर कुटुंबियांनी धावपळ करत विहिरीजवळ धाव घेतली. मात्र तोपर्यंत बराच उशिर झाला होता.

युवकाचे वडील आणि भाऊ शेजारी असलेल्या सोसायटीत वॉचमन म्हणून काम करतात. स्वप्नील हिंजवडीमधील एका लहान कंपनीमध्ये कामाला होता. गेल्या दोन वर्षांपासून त्याला मानसिक त्रास होत होता. त्याचबरोबर त्याच्या व्यसनामुळे घरात सतत भांडणे व्हायची. यातूनच या तरुणाने आत्महत्या केली असण्याची शक्यता पोलिसांनी व्यक्त केली आहे.

तरुणांमधील नैराष्याचे प्रमाण दिवेसंदिवस वाढत चाललेय. आयुष्यात येणाऱ्या अपयशांना सामोरे जाण्याऐवजी तरुण मुलं व्यसानांच्या आहारी जातात. व्यसनाधीन तरुणांना आपण काय करतोय आणि काय नाही हे समजत नाही. अशात काही तरुण रागाच्याभरात स्वत:चं जीवन संपवण्याचा निर्णय घेतात.