Pune Crime News: एकतर्फी प्रेमातून खडकीतील खून; कर्नाटकमधून आरोपी ताब्यात

सचिन जाधव

पुणे : खडकीतील दारुगोळा कारखाना येथील स्टेशन हेडक्वाटर रस्त्यावर भरदिवसा भर रस्त्यात गळ्यावर चाकूने वार करत खून (Crime News) झाल्याची घटना तीन दिवसापूर्वी सोमवारी सकाळी आठ साडे आठच्या सुमारास घडली होती. एकतर्फी प्रेमातून हा खून झाल्‍याचे समोर आले असून यातील आरोपीला पोलिसांनी (Police) ताब्‍यात घेतले आहे. (Maharashtra News)

रजनी राजेश बकेल्लू ( वय ४४ रा. कुंदन कुशलनगर सोसायटी, बोपोडी) असे या हल्ल्यात मृत महिलेचे नाव आहे. दरम्यान आरोपी हा रिक्षा चालक असून मृत महिलेची व त्याची दोन वर्षापूर्वीपासून ओळख झाली होती. मृत महिलेला तो रिक्षाने कामावर सोडत असे. त्यातून आरोपी नसिरचे महिलेवर एकतर्फी प्रेम जडले. मात्र मृत महिलेने प्रतिसाद न दिल्याने रागातून आरोपी नसिरने साथीदाराच्या मदतीने हे कृत्य केले.

तीन दिवसात आरोपी ताब्‍यात

खडकीत खून करणाऱ्या आरोपीला खडकी पोलीसांनी विजापूर कर्नाटकमधून अटक केली आहे. हा खून एकतर्फी प्रेमातून झाल्याचे निष्पन्न झाले आहे. तीन दिवसात खडकी पोलीसांनी या प्रकरणाचा तपास करत आरोपी नसीर बिराजदार व त्याच्या साथीदाराला कर्नाटकच्या विजापूर भागातून अटक केली.