Pune Crime : महिलांचा वेश करून कंपनीमध्ये चोरी; पुण्यातील धक्कादायक प्रकार, सराईत चोरटे अटकेत

सचिन जाधव

पुणे : पुणे शहरातील काही भागात चोरी झाल्याचे प्रकार उघडकीस आले आहेत. यात महिलांसारखा वेष परिधान करून रामटेकडी औद्योगिक वसाहतीतील एका कंपनीत चोरी करण्यात आली होती. या ठिकाणाहून तब्बल दोन लाख रुपयांच्या तांब्याच्या तारांचा बंडल चोरी करण्यात आल्या होत्या. या प्रकरणी पोलिसांकडून तपास सुरु असताना दोन सराईत चोरट्यांना वानवडी पोलिसांनी अटक केली आहे.

पुण्याच्या रामटेकडी परिसरातील औद्योगिक वसाहतीत असलेल्या हारको ट्रान्सफॉर्मर कंपनीत २६ ऑगस्ट रोजी मध्यरात्री ही चोरी झाली होती. दरम्यान या प्रकरणी अमन अजीम शेख (वय २४), मुसा अबू शेख (वय २४, दोघे रा. रामटेकडी, हडपसर) अशी अटक आरोपींची नावे आहेत. या आरोपीकडून दोन लाख १९ हजार रुपयांच्या तांब्याच्या तारा आणि पट्ट्या जप्त करण्यात आला आहे. 

गाऊन, सलवार घालून चोरी  
चोरट्यांनी कंपनीच्या खिडकीचा गज तोडून आत प्रवेश केला. या चोरट्यांमधील एका चोरट्याने पिवळा गाऊन, तर दुसऱ्याने गुलाबी रंगाची सलवार कमीज परिधान केली होता. त्यानंतर तोंडाला ओढणी व स्कार्फ बांधून कंपनीतील खोलीतून तांब्याच्या तारांचे बंडल व पट्ट्या चोरून पोबारा केला. कंपनी मालकाच्या हा प्रकार लक्षात आल्यानंतर या प्रकरणी वानवडी पोलिसात तक्रार दाखल करण्यात आली होती. 

चोरीची दिली कबुली 

यानंतर वानवडी पोलिसांनी घटनास्थळी पाहणी करून सीसीटीव्ही चित्रीकरण तपासले. यात चोरट्यांनी महिलांसारखा वेश परिधान केल्याचे उघडकीस आले. याचा तपास करताना दोन्ही चोरटे पोलिसांच्या ताब्यात सापडले आहेत. त्यांनी चोरी केल्याची कबुली दिली दिली असून तांब्याच्या तारा, पट्ट्या, हार्ड डिस्क असा दोन लाख १९ हजार रुपये किमतीचा मुद्देमाल जप्त करण्यात आला आहे. अधिक तपास वानवडी पोलीस करत आहेत.