Accident News : शेताच्या बांधावरून जाताना ट्रॅक्टर उलटला; शेतकऱ्याचा जागीच मृत्यू

मंचर (पुणे) : शेतामध्ये ट्रॅक्टरचे नुसते धूड घेऊन शेताच्या बांधावरून जात असताना ट्रॅक्टर पलटी झाले. या अपघातात ट्रॅक्टरच्या खाली दबले गेल्याने शेतकऱ्याचा जागीच मृत्यू झाल्याची घटना आंबेगाव तालुक्यातील महाळुंगे पडवळ येथे घडली आहे. घटनेनंतर आजूबाजूच्या परिसरातील नागरिकांनी धाव घेत जेसीबीच्या सहाय्याने ट्रॅक्टर बाजूला करत शेतकऱ्याला बाहेर काढण्यात आले होते. 

पुणे जिल्ह्याच्या आंबेगाव तालुक्यातील महाळुंगे पडवळ शिवारात हि घटना घडली आहे. या अपघातात दीपक रघुनाथ सैद (वय ४१) या तरुण शेतकऱ्याचा मृत्यू झाला आहे. दरम्यान दीपक सैद यांच्या शेताच्या बांधावरुन ट्रॅक्टर खाली पलटी झाला. त्याखाली दीपक सैद दबले गेले होते. घटना पाहून नागरिकांनी धाव घेतली. नागरिकांनी जेसीबी मशिनच्या सहाय्याने ट्रॅक्टर उचलून त्यांना बाहेर काढत उपचारासाठी मंचर उपजिल्हा रुग्णालयात दाखल केले होते. मात्र उपचारापूर्वीच त्यांचा मृत्यू झाला होता. 

हिंगोली शहरात दुचाकी पिकअपचा भीषण अपघात
हिंगोली : हिंगोली शहरातील एनटीसी परिसरात पिकअप वाहन व दुचाकीचा भीषण अपघात झाला. या अपघातात दोघांनी पाय गमावल्याची घटना घडली आहे, जिल्हा सरकारी कामगार कार्यालयाच्या परिसरात दुचाकीवरून जाणाऱ्या दोघांना पिकअप वाहनाने कट मारल्याने हा अपघात घडला आहे.  

पिकअप वाहनाने कट मारल्याने दुचाकी सिमेंट रस्त्याच्या बाजूला असलेल्या नालीमध्ये कोसळली. यात दुचाकी वरील दोघांच्या पायाला गंभीर दुखापत झाली आहे. या घटनेनंतर हिंगोली शहर पोलिसांनी तातडीने घटनास्थळी दाखल होत दोन्ही वाहने ताब्यात घेत जखमींना हिंगोलीच्या शासकीय रुग्णालयात उपचारासाठी भरती केले होते. मात्र दुचाकीवरील दोघांचे पाय निकामी झाल्याचे सांगण्यात येत आहे.