Maharashtra Politics : हा फक्त ट्रेलर! अजित पवारांच्या राष्ट्रवादीचे राज्यातील सर्व कार्यालय पेटवणार ; छावा संघटना आक्रमक

लातूरमध्ये काल छावा संघटनेचे कार्यकर्ते आणि अजित पवार यांच्या राष्ट्रवादीच्या कार्यकर्त्यांमध्ये तुफान हाणामारी झाल्याची बातमी समोर आली आहे. राष्ट्रवादी काँग्रेसचे प्रदेशाध्यक्ष सुनील तटकरे यांच्यासमोर पत्ते फेकल्याच्या आरोपावरून काल छावा संघटनेचे प्रदेशाध्यक्ष विजयकुमार घाडगे यांना जबर मारहाण झाली. या मारहाणीत ते गंभीर जखमी झाले असून त्यांना रुग्णालयात दाखल करण्यात आले आहे. दरम्यान आता छावा संघटनेचे कार्यकर्ते आक्रमक झाले असून सुरज चव्हाण यांनी विजयकुमार घाडगे यांची माफी मागावी अशी मागणी छावा संघटनेच्या कार्यकर्त्यांनी केली आहे.

कृषीमंत्री माणिकराव कोकाटे यांचा विधिंमडळात रमी खेळताना व्हिडीओ समोर आला. या व्हिडिओनंतर राजकारणात खळबळ उडाली. याच व्हिडीओनंतर अजित पवार यांच्या राष्ट्रवादीचे नेते सुनिल तटकरे बसलेले असताना छावा संघटनेच्या पदाधिकाऱ्याने आक्रमक होत त्यांच्यासमोर पत्ते टाकले होते. तसेच "हे घ्या पत्ते आणि मंत्र्यांना तुमच्या घरी पत्ते खेळायला सांगा", असे म्हणत कोकाटेंचा निषेध केला होता. याच घटनेनंतर राष्ट्रवादीच्या कार्यकर्त्यांनी छावा संघटनेच्या पदाधिकाऱ्यांना मारहाण केली.

या घटनेचा व्हिडीओ आता समोर आला असून व्हिडीओत छावा संघटनेच्या पदाधिकाऱ्याला राष्ट्रवादीचे कार्यकर्ते बेदम मारहाण करताना दिसत आहेत. या प्रकरणानंतर जालन्यात छावा संघटनेचे कार्यकर्ते आक्रमक झाले असून थेट अजित पवार गटाच्या जिल्हाध्यक्षांच्या कार्यालयावर काल रात्री बाराच्या सुमारास छावा संघटनेच्या कार्यकर्त्यांनी दगडफेक करून आग लावण्याचा प्रयत्न केला आहे.

राष्ट्रवादीचे सुरज चव्हाण यांची पक्षातून हकालपट्टी करून विजयकुमार घाडगे यांची माफी मागायला सांगा अशी मागणी जालना छावाच्या जिल्हाध्यक्ष संदीप ताडगे यांनी केली आहे. दरम्यान सुरज चव्हाण अजित पवारांच्या आणि सुनील तटकरे यांच्या नावावर जास्त उड्या मारू नका, तुम्हाला महाराष्ट्रभर फिरणं आहे. तसेच सुरज चव्हाण जिथे दिसेल तिथे त्याचा बंदोबस्त करू. शिवाय 'ये तो ट्रेलर है पिक्चर अभी बाकी है' आणि महाराष्ट्रातले अजित पवारांच्या राष्ट्रवादी सगळे कार्यालय पेटून देऊ शकतो, असा जालना छावा संघटनेच्या जिल्हाध्यक्षांनी अजित पवारांच्या राष्ट्रवादीला इशारा दिला आहे. दरम्यान आता काल झालेल्या मारहाणी प्रकरणानंतर अजित पवार राष्ट्रवादी गटाच्या सूरज चव्हाण यांनी दिलगिरी व्यक्त केली असून विजयकुमार घाडगे यांची भेट घेण्याचे म्हटले आहे.