Nashik: आरोपींसोबत पोलिसांची पार्टी, कोर्टातून जेलमध्ये नेताना गेले हॉटेलमध्ये; चौघांना रंगेहाथ पकडले

तरबेज शेख, नाशिक

नाशिकमध्ये पोलिसांनी आरोपींसोबत पार्टी केल्याची धक्कादायक बातमी समोर आली आहे. हॉटेलवर छापा टाकत चार पोलिसांना रंगेहाथ पकडण्यात आले. दोन आरोपींना न्यायालयातून जेलमध्ये घेऊन जाताना वाटेत ते हॉटेलवर गेले होते. याठिकाणी पोलिसांनी आरोपींसोबत जेवणावर ताव मारला. या घटनेमुळे नाशिकमध्ये खळबळ उडाली आहे.

मिळालेल्या माहितीनुसार, नाशिकमध्ये वेगवेगळ्या गुन्ह्यातील २ आरोपींसोबत चक्क पोलिसांचीच पार्टी केली. पोलिस आयुक्तांच्या विशेष पथकाने हॉटेलवर छापा टाकत चार पोलिसांना रंगेहाथ पकडले. न्यायालयातून सेंट्रल जेलकडे घेऊन जात असताना पुणे रोडवर एका हॉटेलमध्ये पोलिसांची आरोपींसोबत पार्टी सुरू होती. रात्री उशिरापर्यंत या चारही पोलिस कर्मचाऱ्यांची वरिष्ठ अधिकाऱ्यांनी चौकशी केली.

न्यायालयीन कामकाजासाठी या दोन्ही आरोपींना नाशिकच्या जिल्हा न्यायालयात आणण्यात आले होते. युनिट एकच पथक आणि वरिष्ठ पोलिस अधिकाऱ्यांनी हॉटेलवर छापा टाकत चारही पोलिसांना आरोपींसोबत पार्टी करताना रंगेहाथ पकडले. या पोलिसांनी आरोपींसोबत जेवणावर चांगलाच ताव मारला होता.

कैद्यांसोबत पोलिस पार्टी करत असल्याची माहिती थेट नाशिक पोलिस आयुक्तांना मिळाली होती. या माहितीनंतर नाशिकचे पोलिस आयुक्त संदीप कर्णिक यांनी घटनेची गंभीर दाखल घेत एका विशेष पथकाला हॉटेलवर पाठवले. या पथकाने पोलिस कर्मचाऱ्यांना पार्टी करताना रंगेहाथ पकडले. या घटनेमुळे नाशिकच्या पोलिस दलात खळबळ उडाली आहे.