Cyber Crime : चांगला नफा मिळविण्यासाठी गुंतवणूक करणे पडले महागात; कोट्यवधी रुपयांचा गंडा

पिंपरी चिंचवड : शेअर मार्केटमध्ये गुंतवणूक केल्यास चांगला नफा मिळवून देण्याच्या आमिषाला बळी पडून गुंतवणूक करण्यात आली. मात्र समोरच्याने एका गुंतवणूकदाराला कोट्यावधी रुपयांचा आर्थिक गंडा घातल्याचा प्रकार पिंपरी चिंचवडमध्ये समोर आला आहे. या प्रकरणी सायबर पोलिसांनी एका जणाला ताब्यात घेतले आहे.  

सायबर गुन्हेगारीचे वाढते प्रमाण डोकेदुखी ठरत आहे. या प्रकरणात गुंतवणूकदाराने दिलेल्या फिर्यादीवरून पिंपरी चिंचवड शहरातील सायबर पोलिसांनी संतोष सदाशिव रूपणर (वय ४७) या सायबर गुन्हेगाराला पुण्यातील मांजरी परिसरातून अटक केली आहे. संतोष सदाशिव रूपणर याने पिंपरी चिंचवड शहरातील एका शेअर मार्केट मधील गुंतवणूकदाराला जवळपास दोन कोटी २४ लाख ५९ हजार ९९९ आर्थिक गंडा घातला आहे. 

ऍप्सच्या माध्यमातून फसवणूक  

शेअर मार्केटमध्ये CALVERT या अप्लिकेशनच्या माध्यमातून गुंतवणूक केल्यास चांगला परतावा मिळवून देण्याचे आमिष दाखवून फसवणूक केली जात होती. अशाच प्रकारे संतोष सदाशिव रूपणर या सायबर भामट्याने गुंतवणूकदाराशी संपर्क साधून शेअर मार्केटमध्ये गुंतवणूक करण्याचे आमिष दाखविले. यातून नफ्याचा परतावा न कोट्यावधी रुपयाचा आर्थिक गंडा घातला आहे. या प्रकरणी सायबर पोलिसात गुन्हा दाखल करण्यात आला होता. 

विविध राज्यात १२ फसवणुकीच्या तक्रारी 

संतोष सदाशिव रूपणर हा फसवणुकीसाठी जो ॲक्सिस बँकेचा बँक अकाउंट वापरत होता. त्या बँक अकाउंटवर जवळपास तीन कोटी ५३ लाख ८७ हजार ९३५ चे व्यवहार आतापर्यंत झाले आहेत. तसेच तो वापरत असलेल्या बँक अकाउंट विरोधात विविध राज्यात जवळपास १२ फसवणुकीच्या तक्रारी दाखल झाल्या आहेत. असं फायबर पोलिसांनी केलेल्या तपासात उघडकीस आल आहे.