पंढरपूर आगारातील प्रवासी बस सेवा उद्यापासून सुरू होणार !

पंढरपूर: आषाढी यात्रेच्या पार्श्वभूमीवर (Ashadhi Ekadashi 2021) पंढरपुरातील बंद करण्यात आलेली एसटीची प्रवासी वाहतूक उद्यापासून सुरू करण्यात येणार आहे. या दरम्यान पंढरपूर आगारातून बाहेर जाणाऱ्या व येणाऱ्या बस गाड्यांना परवानगी देण्यात आली आहे. यामुळे पंढरपूर आगारातून उद्यापासून 215 गाड्यांच्या फेऱ्या सुरू होणार आहेत.

यावर्षी आषाढी यात्रेचा सोहळा प्रतीकात्मक पद्धतीने साजरा करण्यात आला. कोरोनाचा संसर्ग वाढू नये यासाठी निर्बंधामध्ये आषाढी यात्रेच्या सोहळ्यास परवानगी दिली होती .यात्रेसाठी बाहेरगावचे लोक येऊ नयेत यासाठी खबरदारी म्हणून प्रशासनाने 18 ते 25 जुलै पर्यंत संचारबंदी लागू केली आहे. यादरम्यान एसटीची प्रवासी वाहतूक देखील बंद ठेवण्याचा निर्णय घेण्यात आला होता.

परंतु आता पंढरपूर आगारातून होणारी एसटीचे प्रवासी वाहतूक उद्यापासून सुरू करण्याचा निर्णय एसटी प्रशासनाने घेतला आहे. यामध्ये फक्त पंढरपूर आगाराच्या बस‌ गाड्यांना पंढरपुरात येण्यास व जाण्यास परवानगी दिली आहे. यामुळे प्रवाशांना काही प्रमाणात दिलासा मिळाला आहे.

Edited By: Pravin Dhamale