वाई-महाबळेश्वर रस्त्यावरील पसरणी घाट उद्या वाहतुकीसाठी बंद

सातारा: वाईहून पांचगणी- महाबळेश्वरकडे (Wai-Mahabaleshwar ) जाणारा पसरणी घाट रस्ता (Pasarni Ghat) बुधवारी (ता.३०) दिवसभर वाहतुकीसाठी पूर्णपणे बंद राहणार असून येथील वाहतूक इतर मार्गाने वळविण्यात येणार आहे. महाबळेश्वर-पाचगणी या भागात पावसाचे प्रमाण जास्त असते. त्यामुळे या भागातील पसरणी घाटामध्ये दरडी कोसळन्याचे प्रमाण जास्त आहे.

तसेच घाटामध्ये डोंगरामधून रस्त्यावर पाणी येत असते त्यामुळे रस्त्यांची परिस्थिती अत्यंत खराब होत असते त्यातच काही ठिकाणी असणारे संरक्षक कठडे सुद्धा जीर्ण होऊन कोसळले आहेत या सगळ्याची डागडुजी करण्यासाठी हा घाट एक दिवस पूर्णपणे बंद असणार आहे. महाबळेश्वर-पाचगणीमध्ये पर्यटक मोठ्या प्रमाणात येत असतात. परंतु, सध्या कोरोनामुळे (Coronavirus) सर्व ठिकाणी कडक निर्बंन्ध आहेत. त्यामुळे सध्या इथे येणाऱ्या पर्यटकांची संख्या कमी आहे.

पसरणी घाटातील साखळी क्रमांक ६६ /०० ते ७०/०० मधील मोरी व संरक्षक भिंती अतिवृष्टीमुळे पडलेल्या आहेत. त्यामुळे सदरचा रस्ता वाहतुकीस धोकादायक झालेला असल्यामुळे त्याची दुरुस्ती करण्याचे काम प्रगतीपथात आहे. तरी हा रस्ता वाहतुकीस सुस्थितीत करण्यासाठी मोरीचे बांधकाम व संरक्षक भिंतीचे बांधकाम करण्यासाठी बुधवारी (ता.३०) सकाळी ६ ते सायंकाळी ६ पर्यंतच्या कालावधी साठी एक दिवसाकरीता रस्ता वाहतुकीसाठी पूर्णपणे बंद करण्यात येणार आहे.