Parbhani Rain : सेलू, पाथरी, मानवत तालुक्यात पावसाची जोरदार बॅटिंग; पेरणीसाठी दमदार पावसाची प्रतीक्षा

परभणी : राज्यात मान्सूनचे आगमन झाल्यानंतर परभणी जिल्ह्यात देखील अनेक ठिकाणी पावसाचे आगमन झाले. यात रविवारी रात्री व आज सकाळपासून परभणी जिल्ह्यातील सेलू, जिंतूर, पाथरी व मानवत तालुक्यात पावसाने जोरदार बॅटिंग केली. यामुळे बळीराजाला आता दिलासा मिळाला असून पिण्याच्या पाण्याचा प्रश्न देखील काही अंशी सुटणार आहे. 

परभणी (Parbhani) जिल्ह्यात सकाळपासूनच ढगाळ वातावरण होते. तर सायंकाळच्या सुमारास जोरदार पावसाची सुरुवात झाली. ह्या पावसाने पिण्याच्या पाण्याचा प्रश्न काहीअंशी सुटणार आहे. तर नागरिकांना उकड्या पासून दिलासा मिळाला आहे. दरम्यान सेलू शहरातील तेली गल्ली, शनी मंदिर परिसरात मोठ्या प्रमाणात रोडवर पाणी आल्याने मोठी तारांबळ उडाली. तर नाल्याला मागील अनेक (Rain) पावसाळ्यात पाणी येत घरात जात नागरिकांचे मोठे नुकसान झाले आहे. पाऊस पुन्हा वाढला तर ह्या रोडवरील पाणी घरात जाण्याची शक्यता असल्याने पुन्हा नुकसानीची भीती व्यक्त होत आहे.

पेरणीसाठी दमदार पावसाची प्रतीक्षा

परभणी जिल्ह्यातील काही तालुक्यात रात्रीच्या सुमारास जोरदार पाऊस झाला. मात्र जिल्ह्याच्या बहुतांश भागात अजूनही पावसाची प्रतीक्षा आहे. शिवाय पेरणी करण्यायोग्य पावसाची देखील शेतकऱ्यांना (farmer) प्रतीक्षा आहे. जिल्ह्यात चांगला पाऊस झाला तरच पेरणीच्या कामांना वेग येणार आहे.