Parbhani Crime News: पहिलीच्या प्रवेशासाठी लाच घेतली, एसीबीची लिपिकासह मुख्याध्यापकावर कारवाई

Parbhani News : परभणी (Parbhani) जिल्ह्यातील शिक्षण विभागच्या भ्रष्ट कार्यपद्धतीचे रकाने वर्तमानपत्रात दर रोज भरून येण्याची श्रंखला एका बाजूला थांबत नसताना आता जिल्ह्यातील शासनमान्य शाळांमध्ये प्रवेशासाठी भरमसाठ डोनेशन घेऊन पालकांची पिळवणूक होत असल्याचे अधोरेखित होत आहे. (Maharashtra News)

शहरातील बाल विद्या मंदिर प्राथमिक शाळा, नानलपेठ भोई गल्ली येथे पहिलीच्या वर्गात प्रवेशासाठी 7500 रुपयांची लाचेची मागणी करून 4000 रुपये लाच स्वीकारताना येथील शाळेचा कनिष्ठ लिपिक मोहमद अब्दुल रफी मोहमद अब्दुल रशीद (वय 54) तसेच मुख्याध्यापक एकनाथ कच्छवे (वय 57) याला लाच लुचपत प्रतिबंधक विभागाच्या वतीने सापळा लावून अटक केली आहे.

यातील तक्रारदार यांच्या मुलीचे पहिल्या वर्गातील प्रवेशासाठी यातील दोन्ही शिक्षक, शिक्षतर कर्मचारी यांनी 7500 रुपयांची लाच मागणी केली म्हणून तक्रार प्राप्त झाली होती. 28 जून रोजी पंचासमक्ष लाच मागणी पडताळणी केली असता यातील बाल विद्या मंदिर प्राथमिक शाळेचा मुख्याध्यापक व लिपिक यांनी तक्रारदार यांना त्यांच्या मुलीच्या पहिल्या वर्गातील प्रवेशासाठी तडजोडीअंती 5500 रुपये पंचासमक्ष लाचमागणी केली. त्यापैकी 4000 रुपये 3 जुलैला मुख्याध्यापकांनी शाळेचे कनिष्ठ लिपिक यांच्याकडे देण्यास सांगितले. उर्वरित 1500 रुपये दीड ते दोन महिन्यांनंतर आणून देण्यास सांगितले.

3 जुलैला करण्यात आलेल्या सापळा कार्यवाही दरम्यान तक्रारदार यांचे कडून 4000 लाचेची (bribe) रक्कम पंचासमक्ष लिपिकाने स्विकारली. लाचेच्या रकमेसह कनिष्ठ लिपिक यांना लागलीच ताब्यात घेण्यात आले. बाल विद्या मंदिर प्राथमिक शाळेचे मुख्याध्यापक यालाही एसीबी पथकाने शिताफीने ताब्यात घेतले आहे. याबाबत गुन्हा दाखल करण्याची प्रक्रिया नानलपेठ पाेलिस ठाणे येथे करण्यात आली.

या प्रकरणी डॉ.राजकुमार शिंदे पोलीस अधीक्षक,अँटी करप्शन ब्युरो,नांदेड परिक्षेत्र,नांदेड यांच्या मार्गदर्शनाखाली पर्यवेक्षण अधिकारी अशोक इप्पर,पोलीस उप अधीक्षक,अँटी करप्शन ब्युरो, परभणी सापळा तपास अधिकारी बसवेश्वर जकीकोरे पोलीस निरीक्षक अँटी करप्शन ब्युरो, परभणी.सापळा कारवाई पथक म्हणून पोहेकॉ मिलिंद हनुमंते, चंद्रशेखर निलपत्रेवार,पोकॉ अतुल कदम, मोहम्मद जिब्राईल यांनी काम पाहिले.

Edited By : Siddharth Latkar