Pandharpur: विठ्ठल कोणाला पावणार? दादा की शिंदे, पंढरपुरातील महापुजेचा मानकरी कोण?

आषाढी झाल्यानंतर आता कार्तिकी एकादशीची तयारी सुरू आहे. या एकदशीच्या दिवशी उपमुख्यमंत्र्यांना महापुजेचा मान दिला जातो. पण राज्यात दोन उपमुख्यमंत्री आहेत, त्यामुळे एकनाथ शिंदे का अजित पवार कोणाला पंढरीच्या पांडुरंगाची पूजा करण्याचा मान मिळणार असा प्रश्न मंदिर समितीला पडलाय.

आषाढी एकादशीची महापूजा मुख्यमंत्र्यांच्या हस्ते तर कार्तिकी एकादशीची महापूजा उपमुख्यमंत्र्यांच्या हस्ते होत असते. दरम्यान आज पंढरीतील विठ्ठल मंदिर समितीची बैठक झालीय. कार्तिकी एकादशी २ नोव्हेंबर रोजी होत आहे. यावर्षी कार्तिकीच्या पूजेचा मान कोणाला मिळणार हे औत्सुक्याचे असेन. पुजेचा मान देण्यावरून मात्र मंदिर समितीची डोकेदुखी वाढलीय.

कार्तिकी एकादशीच्या या मुद्द्यावर चर्चा करण्यात आली. पण महापुजेचा मान कोणाला मिळेल, यावरून बैठकीतही निर्णय झाला नाहीये. यापैकी कोणत्या उपमुख्यमंत्र्यांच्या हस्ते करायची याची विचारणा आता विधी व न्याय विभागाकडे करण्यात येणार असल्याचं ठरलंय. उपमुख्यमंत्री दोन, पण पुजेचा मानकरी कोण? अशी चर्चा सुरू झालाीय.

यंदा मंदिर समितीचे सहअध्यक्ष गहिनीनाथ महाराज औसेकर यांच्या अध्यक्षतेखाली आज मंदिर समितीची बैठक झाली. त्यामध्ये आषाढी यात्रेप्रमाणेच कार्तिकी यात्रेलाही सर्व सुविधा देण्याचा निर्णय घेण्यात आलाय. यंदा कार्तिकी सोहळ्यात २६ ऑक्टोबरपासून भाविकांना २४ तास दर्शन व्यवस्था सुरू करण्याबाबत निर्णय घेण्यात आलाय. मंदिर जतन व संवर्धन कामाबाबत विभागीय आयुक्त यांच्या अध्यक्षतेखाली बैठक घेण्याबाबतही आजच्या बैठकीत निर्णय घेण्यात आलाय.