Crime News : दुकानाची उधारी मागितल्याने गावात धुडगूस; हवेत गोळीबार करून दुकान, मोटारसायकलची तोडफोड

पंढरपूर : पंढरपूरच्या अकलूज जवळच्या कोंडबावी गावात काही गावगुंडांनी हैदोस मांडल्याच्या पाहण्यास मिळाले. दुकानाची उधारी का मागितली या कारणावरून गावगुंडांनी दुकान चालकास बेदम मारहाण करत धुडगूस घातल्याची घटना घडली आहे. या टोळक्याने हवेत गोळीबार करून किरणा दुकानाची तसेच घरासमोर लावण्यात आलेल्या काही मोटारसायकलींची तोडफोड केली आहे.

अकलूज जवळच्या कोंडबावी गावात हा हवेत गोळीबार केल्याची प्राथमिक माहिती समोर येत आहे. यात सुमारे ३० ते ४० गावगुंडांच्या जमावाने येथील बापू घाडगे यांना व त्यांच्या मुलास बेदम मारहाण केली. तसेच त्यांच्या किराणा दुकानची मोडतोड देखील केली आहे. तर या गावगुंडांनी काही मोटारसायकलींची तोडफोड करत गावात हैदोस घातला आहे. 

उधारीचे पैसे मागितल्याचा राग

बापू घाडगे यांचे गावात किराणा दुकान आहे. किराणा दुकानातून अनिल खरात यांनी उधारीने काही साहित्य नेले होते. त्याची उधारी का मागितली? असा जाब विचारत दुकान मालक बापू घाडगे यांना शिवीगाळ केली होती. यावेळी दोघांमध्ये वाद ही झाला होता. त्यानंतर काही गावगुंडांनी एकत्रित येत बापू घाडगे यांच्या दुकानाची तोडफोड केली. त्यानंतर हवेत गोळीबार करण्यात आला. यामध्ये सुमारे दोन ते अडीच लाख रुपयांचे नुकसान झाल्याची माहिती फिर्यादी बापू घाडगे यांनी दिली आहे. 

गावात तणावाचे वातावरण 

गावामध्ये अशा पद्धतीने ३० ते ४० जणांच्या टोळक्याने गुंडगिरी करत दहशत निर्माण केली. गोळीबार करत सुटल्याने गावात दहशतीचे वातावरण निर्माण झाले असून सध्या गावात तणावपूर्ण वातावरण आहे. दरम्यान घटनेची माहिती पोलिसांना मिळाल्यानंतर पोलिस घटनास्थळी दाखल झाले. याप्रकरणी अकलूज पोलीस ठाण्यात फिर्याद दाखल करण्यात आली आहे याप्रकरणी पोलीस तपास करत आहेत.