Pandharpur : पंढरपुरात चंद्रभागा दुथडी; मंदिरांना पाण्याचा वेढा, पूरस्थिती निर्माण होण्याची शक्यता

पंढरपूर : उजनी आणि वीर धरणातून भीमा नदी पात्रात मोठ्या प्रमाणात पाण्याचा विसर्ग सुरू आहे. त्यामुळे पंढरपुरातील चंद्रभागा नदी दुथडी भरून वाहू लागली आहे. आज सकाळी पंढरपुरातील चंद्रभागा नदीमध्ये २२ हजाराहून अधिक क्युसेक इतका विसर्ग सुरू आहे. चंद्रभागा नदीपात्रातील भक्त पुंडलिक मंदिरासह इतर साधुसंतांच्या समाधीना पाण्याने वेढा दिला आहे. तर जूना दगडी पूल पाण्याखाली गेला आहे.

राज्यात गेल्या काही दिवसांपासून जोरदार पाऊस सुरु आहे. मुसळधार पावसामुळे नदी- नाल्यांना पूर आल्यामुळे अनेक भागात पूरस्थिती निर्माण झाली आहे. त्यानुसार उजनी व वीर धरण पाणलोट क्षेत्रात देखील मोठ्या प्रमाणात पाऊस झाल्याने धरणात पाण्याची आवक वाढली आहे. परिणामी धरणातून मोठ्या प्रमाणात पाण्याचा विसर्ग करण्यात येत असल्याने चंद्रभागा नदी दुथडी भरून वाहत आहे. यामुळे पंढरपुरात पूरस्थिती निर्माण झाली आहे. 

मंदिरांना पुराचा वेढा 

चंद्रभागा नदी दुथडी भरून वाहत असल्याने पंढरपुरातील चंद्रभागा नदीच्या तीरावरील मंदिरांना पुराचा वेढा पडला आहे. नदीपात्रातील भक्त पुंडलिक मंदिरासह इतर साधुसंतांच्या समाधीना पाण्याने वेढा घातला असल्याने येथे भाविकांना दर्शनासाठी जाता येणे शक्य नाही. शिवाय पंढरपुरात आलेल्या भाविकांना देखील चंद्रभागा स्नान करण्यासाठी बंदी करण्यात आली आहे. 

पाण्याचा विसर्ग आणखी वाढणार 

आज दुपारपर्यंत पंढरपुरात पाण्याची पातळी आणखी वाढण्याची शक्यता आहे. प्रशासनाने नदीकाठच्या सर्व गावांना व स्थानिक नागरिकांना सावधानतेचा इशारा दिला आहे. सध्या उजनी धरणातून ७५ हजार तर वीर धरणातून नीरा नदीमध्ये ५४ हजार क्युसेक इतका विसर्ग सुरू आहे. आज संध्याकाळपर्यंत पंढरपुरात तो विसर्ग पोचून चंद्रभागा नदी परिसरामध्ये पूरस्थिती निर्माण होण्याची शक्यता वर्तवली जात आहे.