Palghar News: जमिनीसाठी तुफान राडा! पुरूषांसह महिलांना बेदम मारहाण, ५ गंभीर जखमी; VIDEO व्हायरल

रूपेश पाटील, पालघर

पालघरमध्ये जमिनीच्या वादातून तुफान राडा झालाय. पालघरच्या नागझरी येथे ही घटना घडली. दोन गटात तुंबळ हाणामारी झाली. मनोर पोलीस ठाण्याच्या अंतर्गत येणाऱ्या नागझरी गावामध्ये हा प्रकार घडला आहे. कौटुंबिक वादातून हाणामारी झाल्याची माहिती समोर आली आहे. या घटनेत महिलांना देखील बेदम मारहाण करण्यात आली. या घटनेत जखमी झालेल्या महिलांवर रुग्णालयामध्ये उपचार सुरू आहेत. मनोर पोलीस ठाण्यात तक्रार दाखल करण्यात आली आहे. पोलिस सध्या तपास करत आहेत. या हाणामारीचा व्हिडीओ व्हायरल होत आहे.

मिळालेल्या माहितीनुसार, पालघर तालुक्यातील नागझरी गावात जमिनीच्या वादातून महिलांना लोखंडी रॉडने मारहाण झाल्याची धक्कादायक घटना घडली. या मारहाणीत ३ महिला महिला गंभीर जखमी झाल्या आहेत. विणा विश्राम अधिकारी, रंजना हरेश्वर अधिकारी, सविता तुळशिराम अधिकारी या महिला गंभीर जखमी झाल्यात. तर या मारहाणीमध्ये समीर विश्राम अधिकारी, तुळशिराम बाबू अधिकारी यांना देखील अमानुष मारहाण करण्यात आली.

या प्रकरणी आरोपी निराथाय नाशिक पावडे, जयेश नाशिक पावडे, नितेश सिताराम पावडे, प्रदिप सिताराम पावडे, महेश सदानंद पावडे, निलेश सदानंद पावडे यांच्याविरोधात मनोर पोलीस ठाण्यात गुन्हा दाखल करण्यात आला आहे. वादग्रस्त जमिनीचा निकाल पीडित कुटुंबाच्या बाजूने लागून आरोपींना मनाई हुकूम असताना देखील त्यांनी जबरदस्तीने जागेत प्रवेश केला आणि मारहाण केल्याचा आरोप पीडित कुटुंबाने केला आहे. या घटनेचा व्हिडीओ व्हायरल होत आहे. पोलिस सध्या याप्रकरणाचा तपास करत आहेत.