Mother Killed Baby: नात्याला काळिमा! जन्मताच पोटच्या गोळ्याला आईने संपवले, कारण ऐकून पोलिसही चक्रावले

Palghar Crime News:

पालघरमधून एक धक्कादायक घटना समोर आली आहे. जन्मदात्या आईनेच आपल्या नवजात मुलीची हत्या केली आहे. या महिलेने तिसऱ्या मुलीला जन्म दिला होता. मात्र तिला तिसरं आपत्य नको होतं. त्यामुळे तिने गळा दाबून आपल्या मुलीची हत्या केली. या घटनेमुळे संपूर्ण शहरात खळबळ पसरली आहे. (Latest Marathi News)

सदर महिला विवाहित असून ती पालघरमधील घिवली गावात वर्षभरापासून एकटीच राहत होती. तिचा पती आणि दोन मुलं मुंबईत राहतात. महिलेला एक सात वर्षांची मुलगी आणि चार वर्षांचा मुलगा आहे. तिला तिसरे आपत्य नको होते. त्यामुळे तिने आपल्या बाळाला संपवण्याचा निर्णय घेतला.

पोलिसांनी दिलेल्या माहितीनुसार, महिलेने ३० ऑगस्ट रोजी शासकीय रुग्णालयात बाळाला जन्म दिला. ३ सप्टेंबर रोजी आशा सेवीका महिलेच्या घरी बाळाची चौकशी करण्यासाठी गेल्या होत्या. त्यानंतर ११ सप्टेंबर रोजी त्या पुन्हा बाळाच्या तब्येतीच्या चौकशीसाठी आल्या. यावेळी बाळ घरी नव्हते.

आशा सेवीकांनी महिलेला बाळ घरी घेऊन येण्यास सांगितले. मात्र महिलेने दिलेल्या उत्तरावरून आशा सेवीकांना काहीतरी गडबड असल्याचा संशय आला. ११ सप्टेंबर रोजी रात्री १० वाजता आशा सेवीकांनी पोलिसांना याबाबत तक्रार दिली.

पोलिसांनी महिलेच्या घरी येऊन तिची चौकशी केली. यावेळी शेजाऱ्यांशी बातचीत केली असता समजले की, ४ सप्टेंबर रोजी महिला बाळाला घेऊन बाहेर गेली होती. ती जेव्हा घरी आली तेव्हा तिच्याकडे बाळ नव्हते. शेजाऱ्यांनी दिलेल्या माहितीवरून पोलिसांनी महिलेला ताब्यात घेतलं. पुढे चौकशीत आपण आपल्या बाळाची हत्या केल्याचे कबूल केले.