Palghar Crime: जिल्हाधिकारी कार्यालयात काम करणाऱ्या तरुणीवर कोयत्याने प्राणघातक हल्ला

रुपेश पाटील, साम प्रतिनिधी

पालघर शहरातील गोल्ड सिनेमा परिसरात भरदिवसा एका तरुणीवर कोयत्याने जीवघेणा हल्ला झाल्याची धक्कादायक घटना घडली आहे. हल्लेखोराने तरुणीच्या मानेवर व कमरेवर सपासप वार केल्याची प्राथमिक माहिती समोर आली आहे. संध्याकाळी साडेसहाच्या दरम्यान ही घटना घडली.

या हल्ल्यानंतर आरोपी घटनास्थळावरून फरार झाला आहे.गंभीर जखमी झालेल्या तरुणीला तातडीने उपचारासाठी पालघर ग्रामीण रुग्णालयात दाखल करण्यात आले. मात्र गंभीर जखमी असल्याने उपचारासाठी तिला पुढे शहरातील एका खासगी रुग्णालयात पाठविण्यात आले आहे. सदर तरुणी ही पालघरच्या महसूल खात्यात कार्यरत असल्याची प्राथमिक माहिती समोर आली आहे.

घटनेची माहिती मिळताच पालघर पोलीस ठाण्याचे पोलीस निरीक्षक अनंत पराड आणि पथक घटनास्थळी दाखल झाले असून आरोपीचा शोध सुरू आहे. हल्ल्यामागील नेमके कारण अद्याप समोर आलेले नसले तरी प्रेम प्रकरणातून हा हल्ला झाल्याची प्राथमिक माहिती समोर येत आहे. पालघर पोलीस अधीक्षक तपास करीत आहेत.

संध्याकाळी नेमकं काय घडलं?

पालघरच्या गोल्ड सिनेमागृहाजवळ आज, शुक्रवारी सहा ते साडेसहा वाजताच्या सुमारास ही घटना घडली. सिनेमागृहाजवळच्या परिसरात स्नेहल सावंत या तरुणीवर अमोल नावाच्या तरुणाने कोयत्याने हल्ला केला. ती तरुणी जिल्हाधिकारी कार्यालयात काम करते. ती काम आटोपून या रस्त्याने जात होती. त्यावेळी आरोपीने तिच्यावर कोयत्याने हल्ला केला. या घटनेची माहिती मिळाल्यानंतर पथक घटनास्थळी पोहोचले.

गंभीर जखमी झालेल्या तरुणीला रुग्णालयात तातडीने नेण्यात आले. पालघरमध्ये उपचारानंतर पुढील उपचारासाठी पालघरला नेण्यात आले. आरोपी घटनास्थळावरून पसार झाला आहे. आरोपीचा शोध घेण्यासाठी पथके रवाना केली आहेत. प्राथमिक तपासानुसार, ही घटना प्रेमप्रकरणातून घडली असण्याची शक्यता आहे. लवकरच आरोपीला अटक करून चौकशीतून नेमका प्रकार उघड होईल, अशी माहिती पोलिसांनी दिली.