Jalna News : मनोज जरागेंना लय पुळका आलाय, महादेव जानकरांना पाडण्यासाठी किती बैठका घेतल्या? लक्ष्मण हाके संतापले

मराठा आरक्षणाला विरोध करण्याऐवजी ओबीसी नेत्यांनी धनगर समाजाच्या आरक्षणावर लक्ष केंद्रित करा, असा सल्ला मनोज जरांगे पाटील यांनी दिला होता. धनगर बांधवांनी ठरवलं की एसटी प्रवर्गातून आरक्षण घ्यायचं ठरवलं तर त्यांना ते मिळू शकतं, असं विधानही जरांगे यांनी केलं होतं. त्यांच्या या विधानाचा ओबीसी आंदोलक लक्ष्मण हाके यांनी चांगलाच समाचार घेतला.

मनोज जरांगे पाटील यांना धनगर समाजाचा लय पुळका आलाय का? महादेव जानकर यांना पाडण्यासाठी त्यांनी किती बैठका घेतल्या? असे तिखट सवाल लक्ष्मण हाके यांनी विचारले आहेत. कोणाच्याही प्री प्लान अजेंड्यावर काम करायला आम्ही काही जरांगे नाही, असा टोलाही त्यांनी जरांगे यांना लगावला आहे. ते जालन्यात माध्यमांसोबत बोलत होते.

राज्य सरकारने सगेसोयरेचा अध्यादेश काढू नये, तसेच ओबीसी समाजाच्या मागण्या मान्य कराव्यात यासाठी लक्ष्मण हाके हे जालन्यात प्राणांतिक उपोषणाला बसले आहेत. आज त्यांच्या उपोषणाचा सहावा दिवस आहे. जोपर्यंत ओबीसी आरक्षणाबाबत राज्य सरकार लेखी आश्वासन देत नाही, तोपर्यंत मी माघार घेणार नाही, असा निर्धार हाके यांनी व्यक्त केला आहे.

माध्यमांसोबत बोलताना लक्ष्मण हाके म्हणाले, "मनोज जरांगे यांना धनगर समाजाचा लय पुळका आला का? परभणीतून महादेव जानकर यांना पडण्यासाठी किती बैठका घेतल्या हे जरांगे यांनी सांगावं. जरांगे साहेब तुम्हाला नॉलेज नाही. तुम्हाला कुठल्या चळवळी आंदोलन माहित नाही. धनगरांच्या चार पिढ्या एसटी आरक्षणासाठी भांडताय. ते आम्ही बघू, धनगर समाज दूधखुळा वाटला का".

"ओबीसी आरक्षणाच्या संरक्षणासाठी धनगर समाज मोठा भाऊ म्हणून पुढे येणार. आमच्या ताटातलं हक्काच आरक्षण आहे. 27% मध्ये 3.5% टक्के रिझर्वेशन धनगर समाज आहे. लक्ष्मण हाकेला इथल्या बारा बलुतेदार घटनेचा तसेच कायद्याचा अभ्यास आहे. कुणाच्याही सांगण्यावरून काम करायला मी काय जरांगे आहे का", असा टोला देखील हाके यांनी जरांगे यांना लगावला.