Nashik News : भाविकांवर मोकाट जनावरांचा हल्ला; दोन भाविक गंभीर जखमी

अजय सोनवणे 

मनमाड (नाशिक) : रस्त्यावर असलेल्या मोकाट जनावरांचा त्रास वाढतच चालला आहे. बऱ्याचदा मोटारसायकल किंवा पायी चालणाऱ्यांवर हल्ला केल्याच्या घटना घडल्या आहेत. अशीच घटना येवल्यात घडली आहे. कोटमगाव देवीच्या यात्रेतून परतत असताना मोकाट जनावरांचा दोन भाविकांवर हल्ला केला. या हल्ल्यात भाविक गंभीर जखमी झाले आहेत. 

नाशिकच्या (Nashik News) येवल्यात मोकाट जनावरांचा प्रश्न पुन्हा ऐरणीवर आला आहे. काही दिवसांपूर्वीच मोकाट जनावरांच्या हल्ल्यात एका तरुणाचा दुर्दैवी मृत्यू झाला होता. यानंतर देखील मोकाट जनावरांचा बंदोबस्त करण्यात आला नाही. दरम्यान सदरची घटना ताजी असतानाच काल रात्रीच्या सुमारास येवल्यातील कोटमगाव येथील नवरात्र उत्सवातून घरी परतत असताना सोनल विजय दाणेज व साई विजय दाणेज या दोघांवर मोकाट जनावरांनी हल्ला केला. 

दोघे गंभीर जखमी 

मोकाट जनावरांनी केलेल्या हल्ल्यात हे दोघे गंभीर जखमी झाले असून त्यांच्या वर जिल्हा रुग्णालयात उपचार सुरू आहेत. या घटनेमुळे रस्त्यावरील मोकाट जनावरांचा बंदोबस्त करावा अशी मागणी जोर धरू राहिली आहे. यामुळे दोन घटनांनंतर प्रशासन आता काय पाऊल उचलणार हे पाहणे महत्वाचे ठरणार आहे.