Nashik : निवडणुकीच्या तोंडावर ठाकरेंना पुन्हा धक्का? नाशिकमध्ये खिंडार पडणार, शिलेदारांची उघड नाराजी

Nashik political crisis : आगामी स्थानिक स्वराज्य संस्थांच्या निवडणुकीच्या पार्श्वभूमीवर नाशिकमध्ये ठाकरेंच्या शिवसेनेला खिंडार पडण्याची चिन्हं आहेत. ठाकरे सेनेच्या नेत्यानं एक मोठा गौप्यस्फोट केलाय. ज्यामुळे ठाकरे सेनेला खिंडार पडणार आहे? ते कसं पाहूयात साम टिव्हीचा या स्पेशल रिपोर्टमधून...

आगामी स्थानिक स्वराज्य संस्थांच्या निवडणुकीवर ठाकरे गटाला लागलेली गळती काही थांबायचं नाव घेत नाहीये. ठाकरे गटातील अनेकांनी शिंदेंच्या शिवसेनेत प्रवेश करत शिंदेंशी घरोबा केलाय. त्यावेळी एकट्यानं खिंड लढवणाऱ्या सुधाकर बडगुजर यांच्या एका वक्तव्याने ठाकरे गटात खळबळ माजलीय.

विशेष म्हणजे एक दिवस आधीच सुधाकर बडगुजर यांनी नाशिक दौऱ्यावर असलेल्या मुख्यमंत्री देवेंद्र फडणवीस यांची भेट घेतली होती. या भेटीने राजकीय चर्चांना उधाण आलं होतं. आपली नाराजी जाहीरपणे उघड करत बडगुजर यांनी पक्षाला आणखी एक धक्का दिलाय.

कोण आहेत सुधाकर बडगुजर

- शिवसेना ठाकरे गटाचे उपनेते

- लोकसभा निवडणुकीवेळी एकट्याने खिंड लढवत पक्षाचा खासदार निवडून आणला

- विधानसभा निवडणुकीत त्यांचा पराभव

- १९९३ च्या बॉम्बस्फोटातील आरोपी सलीम कुत्तासोबतच्या पार्टीचा बडगुजर यांचा व्हिडीओ समोर आल्यानंतर खळबळ

- महापालिकेत नगरसेवक असतांना स्वतःच्याच कंपनीला ठेका दिल्याप्रकरणी ACB कडून चौकशी

- ऐन विधानसभा निवडणुकीदरम्यान जीवघेण्या हल्ल्या प्रकरणी बडगुजर यांचा मुलगा दीपक बडगुजर याच्यावर मोक्कांतर्गत कारवाई

विधानसभा निवडणुकीत महाविकास आघाडीचा झालेला पराभव आणि महायुतीची एक हाती आलेली सत्ता यामुळे अडचणीत आलेले बडगुजर यांच्या पक्ष सोडणार असल्याच्या चर्चा अधूनमधून होत होत्या. आता थेट बडगुजर यांनीच पक्ष संघटनेतील बदलावेळी आपल्याला विश्वासात न घेतल्याचं जाहीरपणे म्हटलय, त्यांचं हे वक्तव्य म्हणजे पक्ष सोडण्याचे संकेत दिले असल्याचीच चर्चा आहे. शिवसेना ठाकरे गटाचे नेते याप्रकरणी सारवासारव करण्याचा प्रयत्न करत असले तरी ठाकरे गटात काही अलबेल नाही हेच सिध्द झालंय.

विशेष म्हणजे जे महानगर प्रमुख विलास शिंदे नाराज असल्याचं बडगुजर यांनी म्हटलंय. त्या विलास शिंदे यांच्या कन्येच्या विवाह सोहळ्याला अवघ्या काही मिनिटांची उपस्थिती लावण्यासाठी उपमुख्यमंत्री एकनाथ शिंदे खास मुंबईहून विमानाने आले होते. त्यांची ही उपस्थिती राजकीय घडामोडींचे संकेत देणारी होती.

ऐन महापालिका निवडणुकीच्या पार्श्वभूमीवर उपनेते बडगुजर आणि महानगर प्रमुख विलास शिंदे हे दोघेही नाराज असल्याचा बातम्या बाहेर आल्या आहेत. त्यामुळे येत्या काळात बडगुजर यांच्यासह महानगरप्रमुख विलास शिंदे आणि अन्य पदाधिकारी पक्षातून बाहेर पडले, तर उद्धव ठाकरेंना हा मोठा राजकीय धक्का मानला जातोय.