Nashik : सासरच्या जाचाला कंटाळून विवाहित महिलेने आयुष्य संपवलं; माहेरच्या लोकांकडून घरासमोर पार्थिवावर अंत्यविधी

अजय सोनवणे, साम टीव्ही

एका २२ वर्षीय विवाहित महिलेने घरात गळफास आयुष्य संपवलं. त्यानंतर या महिलेच्या कुटुंबीयांनी तिचा पार्थिवावर सासरच्या लोकांच्या घरासमोरच अंत्यविधी केला. नाशिकच्या चांदवड तालुक्यातील पिंपळगाव धाबली गावात ही संपूर्ण घटना घडली. विवाहित महिलेच्या आत्महत्या प्रकरणी सासरच्या मंडळीवर गुन्हा नोंदवण्यात आला आहे.

काही महिन्यांपूर्वी पुण्यातील वैष्णवी हगवणे प्रकरणामुळे संपूर्ण महाराष्ट्र हादरला होता. या प्रकरणात चहूबाजूंनी कठोर कारवाईची मागणी करण्यात आली होती. आता नाशिकच्या चांदवडणमध्ये तशीच घटना घडली आहे. चांदवडमधील पिंपळगाव धाबली येथील 22 वर्षीय विवाहितेने घरात गळफास घेत आत्महत्या केली.

'सासरच्या लोकांनी गाडी आणि मोबाईल फोन तुझ्या माहेरच्यांनी दिला नाही. लग्नात काही दिले नाही. घरून पैसे घेऊन ये, अशी वारंवार मागणी करत तिला मारहाण,शिवीगाळ केली. या जाचाला कंटाळून मोहिनी चंद्रकांत आहिरे या विवाहितेने गळफास घेत आत्महत्या केली. तिच्या माहेरच्या लोकांना याची माहिती मिळताच मोठया संख्येने माहेरचे लोक पिंपळगाव ढाबळी येथे पोहचले.

मोहिणीच्या संतप्त नातेवाईकांनी तिच्या सासरच्या घरासमोर चिता रचत तिचा अंत्यविधी केला. या घटनेमुळे तणाव निर्माण झाला होता. या प्रकरणी चांदवड पोलिसात पतीसह सासरच्या 6 जणांविरोधात गुन्हा दाखल करण्यात आला आहे. या प्रकरणी पोलीस अधिक तपास करीत आहे.