Accident News : महामार्गावर विचित्र अपघात! भरधाव कारची दुचाकीला धडक; २ जणांचा जागीच मृत्यू

नाशिक-छत्रपती संभाजीनगर महामार्गावर येवला तालुक्यातील अंदरसूलजवळ दुचाकी आणि कारच्या भीषण अपघातात दोघांचा मृत्यू झाला, तर एक जण गंभीर जखमी झाला आहे. अंदरसूल येथील हॉटेल स्वामीजवळ हा अपघात घडला. या घटनेमुळे परिसरात हळहळ व्यक्त होत आहे.याप्रकरणी पोलीस पुढील तपास करत आहेत.

मिळालेल्या माहितीनुसार, दुचाकीवरील तिघे वैजापूर येथून येवल्याच्या दिशेने प्रवास करत होते. दरम्यान, अंदरसूल येथील हॉटेल स्वामीजवळ त्यांच्या दुचाकीला भरधाव कारने जोरदार धडक दिली. या धडकेमुळे दुचाकीवरील तिघेही गंभीर जखमी झाले. अपघाताची तीव्रता लक्षात घेता घटनास्थळी नागरिकांची गर्दी झाली.

अपघाताची माहिती मिळताच आजूबाजूच्या नागरिकांनी तातडीने घटनास्थळी धाव घेतली. त्यांनी जखमींना मदत करत उपचारासाठी येवला येथील शासकीय रुग्णालयात हलवण्याची व्यवस्था केली. मात्र, रुग्णालयात नेत असताना एका जखमीचा रस्त्यातच मृत्यू झाला. अन्य जखमींवर वैद्यकीय उपचार सुरू करण्यात आले. त्यापैकी एका गंभीर जखमीची प्रकृती लक्षात घेऊन त्याला पुढील उपचारासाठी नाशिक येथे हलवण्यात आले आहे.

या अपघातात दोघांचा मृत्यू झाल्याने परिसरात शोककळा पसरली आहे. महामार्गावरून प्रवास करताना वाहनचालकांनी वेगावर नियंत्रण ठेवून वाहतुकीचे नियम पाळावेत, असे आवाहन करण्यात येत आहे. दरम्यान, अपघाताची माहिती मिळाल्यानंतर पोलिसांनी घटनेची नोंद घेऊन पुढील तपास सुरू केला आहे. अपघात नेमका कशामुळे झाला, याचा शोध पोलीस घेत आहेत.