Municipal Commissioner Residence : महापालिका आयुक्त निवासस्थानाची शहरभर चर्चा; वास्तूदोषाचा विषय येतोय समोर, आयुक्त कार्यालयाकडून मात्र इंकार

तबरेज शेख 

नाशिक : शासकीय निवासस्थानी अधिकारी, कर्मचारीला राहण्याचे बंधनकारक आहे. परंतु नाशिक (Nashik) महानगरपालिका आयुक्त तथा प्रशासक डॉ. अशोक करंजकर यांचे शासकीय निवासस्थान सध्या वेगळ्याच कारणाने चर्चेत आले आहे. निवासस्थानी वास्तुदोष असल्याने बांगला खाली केल्याची चर्चा संध्या आहे. (Live Marathi News)

नाशिक शहरातील गडकरी चौक या परिसरात महापालिका आयुक्तांचे शासकीय निवासस्थान आहे. मात्र ऐन सणासुदीच्या दिवशी नाशिक शहरात एक वेगळी चर्चा सुरू झालीय. आयुक्त निवासस्थानी वास्तुदोष (ANIS) असल्याने महापालिका आयुक्त खाजगी घरात राहण्यासाठी गेल्याची चर्चा नाशिक शहरात आहे. 

अंनिसकडून या प्रकारचा निषेध 

अशाप्रकारे जर उच्चपदस्थ अधिकारी वास्तुदोषाच्या समजातून खाजगी ठिकाणी राहण्यासाठी जात असेल, तर हे चुकीचं असल्याची टीका अंधश्रद्धा निर्मूलन समितीच्यावतीने करण्यात आली आहे. उच्चपदस्थ अधिकाऱ्यांकडून अशा रीतीने अंधश्रद्धेला खतपाणी घातले जात असेल, तर याचा निषेध देखील करण्यात आलाय.

आयुक्त कार्यालयाकडून खरे कारण आले समोर 
मात्र असा वास्तुदोष वगैरे काही नाही. शासकीय निवासस्थानी बंगल्याची दुरुस्ती सुरू असल्याने आयुक्त काही कालावधीसाठी खाजगी फ्लॅटमध्ये राहण्यासाठी गेले असल्याचे स्पष्टीकरण आयुक्त कार्यालयाकडून देण्यात आलंय. मात्र या तर्कवितर्काने नाशिक शहरात वेगळीच चर्चा रंगलीय.