Nashik Kumbh Mela: कुंभमेळ्यासाठी प्रशासनाचा मोठा प्लॅन, 4,500 बसेस धावणार; दररोज 33 लाख भाविक करणार प्रवास

नाशिकच्या सिंहस्थ कुंभमेळ्यात कोणत्याच प्रकारची कमतरता भासली नाही, पाहिजे यासाठी प्रशासन जोरदार कामाला लागले आहे. कुंभमेळा प्राधिकरणाने महाराष्ट्र राज्य मार्ग परिवहन महामंडळाच्या माध्यमातून व्यापक सार्वजनिक वाहतूक आराखडा तयार केला आहे. त्यानुसार भाविकांचा प्रवास सुरक्षित व सुलभ व्हावा प्रशासनाने एक मोठा प्लॅन आखला आहे. नाशिक कुंभमेळ्यासाठी सुमारे ४५०० बस तैनात करण्यात येणार आहेत. याच्या माध्यमातून दररोज तब्बल ३३ लाखांहून अधिक भाविकांची वाहतूक होणार आहे. (MSRTC special bus services for Kumbh Mela 2027)

सिंहस्थ कुंभमेळा प्राधिकरणाच्या वाहतूक आराखड्यात अंतर्गत प्रवासी उतरविण्याची ठिकाणांचे योग्य नियोजन करण्यात आले आहे. यात बाह्य वाहनतळ, रामकुंड तसेच त्र्यंबकेश्वर मंदिर परिसरातील पायी मार्ग व्यवस्था अशा तीन स्तरांवर नियोजन करण्यात आले आहे. याअंतर्गत रस्ते मार्गाने येणाऱ्या भाविकांसाठी ४६ बाह्य वाहनतळांपासून विशेष बस सोडण्यात येणार आहे.

यात नाशिकमधील बाह्य वाहनतळ ते अंतर्गत ठिकाणांसाठी ९०० बस नाशिक वाहनतळ ते त्र्यंबकेश्वर मार्गासाठी एक हजार ४८५ बस आणि तर त्र्यंबकेश्वरमधील अंतर्गत वाहतुकीसाठी ३२५ बस उपलब्ध असणार आहेत.गर्दीच्या काळातील अतिरिक्त गरज लक्षात घेऊन २९० बस राखीव ठेवण्यात येतील. या व्यवस्थेद्वारे २४ तासांत सुमारे ४०७ फेऱ्यांचे नियोजन केले आहे. दररोज सुमारे २५.३६ लाख भाविकांची वाहतूक होईल अशी शक्यता आहे.

यासह देशभरातून रेल्वेने येणाऱ्या भाविकांसाठीही स्वतंत्र बस फेऱ्यांचे नियोजन करण्यात आले आहे. नाशिक रोड, देवळाली, ओढा, खेरवाडी आणि कसबे सुकेणे या पाच रेल्वेस्थानकांना बससेवेशी जोडण्यात येतील. त्यासाठी एक हजार ५०० बसचे नियोजन केले आहे. यातील ५२० बस रेल्वेस्थानक ते अंतर्गत वाहनतळ आणि ६८० बस रेल्वेस्थानक ते त्र्यंबकेश्वर मार्गावर धावतील. तसेच ३०० बस राखीव ठेवण्यात येतील. यातून दररोज सुमारे ८.२६ लाख रेल्वे प्रवाशांची वाहतूक करता येणार असल्याची माहिती प्राधिकरणाने दिली आहे.