Nashik News : धरण परिसरात पर्यटनासाठी आला अन् जीव गमावला; पोहताना धरणाच्या ओवरफ्लोमध्ये बुडाला

इगतपुरी (नाशिक) : सुटी असल्याने सुटीचा आनंद घेण्यासाठी इगतपुरी तालुक्यातील भावली धरण परिसरात पर्यटनासाठी गेले असताना पोहण्यासाठी धरणात उतरलेल्या २४ वर्षीय युवक बुडाला आहे. पोहत असताना धरणाच्या ओव्हरफ्लोमध्ये गेल्याने त्याचा बुडून मृत्यू झाल्याची घटना घडली आहे. 

म्हाडा वर्सोवा (मुंबई) येथील अतिक नाशिर खान असे बुडून मृत्यू झालेल्या तरुणाचे नाव आहे. मंगळवारी सकाळी अतिक खान हा त्याच्या तीन मित्रांसोबत (Igatpuri) इगतपुरी तालुक्यातील भावली धरण येथे पोहण्यासाठी आला होता. तिघेजण पोहण्यासाठी धरणाच्या पाण्यात उतरले. मात्र भावली धरणाजवळील ओव्हरफ्लोच्या पाण्याचा अंदाज न आल्याने तो बुडाला असल्याची माहिती त्याच्या मित्रांनी इगतपुरी पोलिसांना दिली होती. 

घटनेची माहिती मिळताच स्थानिक पानबुड्या व्यक्तींकडून शोध कार्य सुरू करण्यात आले होते. दरम्यान आज दुपारी शोधकार्याला यश आले आहे. तरुणाचा मृतदेह बाहेर काढण्यात आला. मृतदेह उत्तरीय तपासणीसाठी इगतपुरी ग्रामीण रुग्णालयात पाठवला आहे. पर्यटन करण्यासाठी येणाऱ्या पर्यटकांनी आपल्यासह सर्वांची काळजी घेऊन पाण्यात जायला पाहिजे; अशी अपेक्षा स्थानिक गावकऱ्यांनी व्यक्त केली आहे.