Ashok Kharat: अशोक खरातचा नवा कारनामा, महादेवाचा अवतार असल्याची थाप; करिअर घडवतो सांगत तरुणीवर लैंगिक अत्याचार

Summary -

• अशोक खरातविरोधात सातवा लैंगिक अत्याचाराचा गुन्हा दाखल

• ‘महादेवाचा अवतार’ असल्याचा दावा करत तरुणीची फसवणूक

• करिअरच्या आमिषाने वारंवार लैंगिक शोषण

• एसआयटीकडून सात दिवसांपासून चौकशी सुरू

• प्रकरणात आणखी धक्कादायक खुलास्यांची शक्यता

अभिजीत सोनवणे, नाशिक

ज्योतिषी असल्याचे सांगून १०० पेक्षा अधिक महिलांवर अत्याचार करणाऱ्या नाशिकचा भोंदूबाबा अशोक खरातचा आणखी एक धक्कादायक कारनामा समोर आला आहे. अशोक खरातविरोधात एका महिलेवर लैंगिक अत्याचार केल्याप्रकरणी आणखी एक गंभीर गुन्हा दाखल करण्यात आला आहे. नाशिकच्या सरकारवाडा पोलिस ठाण्यात त्याच्याविरोधात सातवा गुन्हा दाखल झाला आहे. करिअर घडवण्याच्या आमिषाने त्याने लैंगिक शोषण केल्याची तक्रार एका पीडित तरुणीने दिली आहे.

आरोपी अशोक खरातने संमोहित करून तरुणीवर लैंगिक अत्याचार केल्याचा तक्रारीत उल्लेख करण्यात आला आहे. स्वतःला 'महादेवाचा अवतार' असल्याचे सांगत त्याने तिच्यावर जबरदस्ती केली. तर विरोध केल्यास कुटुंब संपवण्याची धमकी त्याने दिली होती. जुलै २०२४ ते डिसेंबर २०२४ दरम्यान अशोक खरातने पीडित तरुणीवर वारंवार अत्याचार केले. भीतीमुळे पीडिता गप्प राहिली शेवटी अशोक खरातचे प्रकरण समोर आल्यानंतर तिने धाडस करत पुढे येत याप्रकरणी तक्रार दाखल केली. अशोक खरातविरोधात महिलांच्या लैंगिक अत्याचाराचे ७ गुन्हे दाखल झाले आहेत. या गुन्ह्यांची संख्या आणखी वाढण्याची शक्यता आहे.

दरम्यान, भोंदूबाबा अशोक खरातची एसआयटीकडून सलग सातव्या दिवशी चौकशी सुरू आहे. एसआयटी प्रमुख तेजस्वीनी सातपुते यांच्या उपस्थितीत गोपनीय ठिकाणी त्याची चौकशी केली जात आहे. सकाळी १० वाजता चौकशीला सुरुवात झाली. कालच नाशिक न्यायालयाकडून अशोक खरातला ५ दिवसांची पोलिस कस्टडी सुनावण्यात आली. कस्टडी मिळताच दुसऱ्याच दिवशी पोलिसांनी या प्रकरणाच्या चौकशीचा वेग वाढवला आहे. या तपासात पोलिस लैंगिक शोषणाचे विविध गुन्हे, आर्थिक व्यवहार आणि नेटवर्कवर फोकस करत आहेत. या तपासातून आणखी धक्कादायक खुलासे होण्याची शक्यता वर्तवली जात आहे.