Nashik CCTV Footage: टोळक्याचा सोसायटीमध्ये घुसून तरुणावर जीवघेणा हल्ला, थरारक घटनेचा VIDEO आला समोर

Nashik News : नाशिक रोड परिसरात तरुणावर जीवघेणा हल्ला झाला आहे. चार ते पाच जणांच्या टोळक्यांना तरुणावर हत्यारांसह हल्ला केला. या घटनेत तरुण गंभीररित्या जखमी झाला आहे. पोलिसांनी याप्रकरणी गुन्हा दाखल केला असून आरोपींचा शोध सुरु केला आहे.  (Latest Marathi News)

नाशिक रोड परिसरातील देवळाली गाव भागात म्हसोबा मंदिरामागे असलेल्या हरी श्रद्धा अपार्टमेंट मध्ये रात्री १०.३० वाजेच्या सुमारास शिबान शेख या २७ वर्षीय युवकावर ४ ते ५ जणांनी जीवघेणा हल्ला करून जखमी केले. संपूर्ण घटना सोसायटीत लावलेल्या सीसीटीव्ही कॅमेऱ्यामध्ये कैद झाली आहे.

हरी श्रद्धा अपार्टमेंटमध्ये राहणारा शीबान हा आपल्या घरी जात असताना हल्लेखोरांनी हातात तलवारी, कोयते आदी तीक्ष्ण हत्यारांनी त्याच्यावर जबर वार केले. शिबन शेख याच्यावर इतके वार झाले की त्याला उठता सुद्धा येत नव्हते. स्थानिकांच्या मदतीने त्याला त्वरित नाशिक रोड येथील जयराम हॉस्पिटलमध्ये दाखल करण्यात आले आहे.

घटनेची माहिती मिळताच उपनगर पोलीस ठाण्याचे अधिकारी आणि कर्मचारी घटनास्थळी दाखल झाले. या हल्ल्याच्या घटनेमुळे परिसरात भीतीचं वातावरण पसरले आहे. पोलीस अधिक तपास करत आहेत. नाशिक शहरात जीवघेणे हल्ले, खून, दरोडे, तसेच चोऱ्यांचे प्रमाण वाढले असून पोलिसांचा गुन्हेगारांवर वचक राहिलेला नसल्याने नागरिक भयभीत झाले आहेत.