Nashik : नाशिक हादरलं! पत्नीचा खून करून पतीने केली आत्महत्या; धक्कादायक कारण समोर

अजय सोनावणे, नाशिक

नाशिकमधून मोठी बातमी समोर आली आहे. श्रीपुरवडे येथे पत्नीची हत्या करून पतीने आत्महत्या केल्याची धक्कादायक घटना घडली आहे. कौटुंबिक वादातून ही घटना घडल्याचा प्राथमिक अंदाज पोलिसांनी व्यक्त केला असून या दुहेरी मृत्यूमुळे गावात हळहळ व्यक्त होत आहे. याप्रकरणी पोलीस पुढील तपास करत आहेत.

मिळालेल्या माहितीनुसार, श्रीपुरवडे- जायखेडा रस्त्यालगत शेतात वास्तव्यास असलेले मुरलीधर राघो ठाकरे (वय ६५) आणि त्यांची पत्नी यशोदाबाई मुरलीधर ठाकरे (वय ५८) हे दोघे घरी एकटेच होते. त्यांचा मुलगा समाधान ठाकरे व सून हे नातेवाईकांच्या लग्नसमारंभासाठी बाहेरगावी गेले होते. दरम्यान, पती-पत्नीमध्ये झालेल्या अंतर्गत कौटुंबिक वादातून मुरलीधर ठाकरे यांनी संतापाच्या भरात कोयत्याने पत्नी यशोदाबाई यांच्यावर वार केल्याचे सांगितले जात आहे.

यात त्यांचा जागीच मृत्यू झाला. त्यानंतर मुरलीधर ठाकरे यांनी विषारी औषध प्राशन करून गळफास घेत आत्महत्या केल्याची माहिती समोर आली आहे. ही घटना रात्री सुमारे आठच्या सुमारास उघडकीस आली. लग्नसमारंभ आटोपून मुलगा व सून घरी परतले असता घरात अंधार असल्याने त्यांनी घरातील स्विचबोर्ड सुरू केला. त्यावेळी घरात यशोदाबाई या रक्ताच्या थारोळ्यात पडलेल्या दिसल्या. हा प्रकार पाहून त्यांनी आरडाओरड केल्याने आजूबाजूचे नागरिक घटनास्थळी धावले.

नागरिकांनी तातडीने ‘११२’ क्रमांकावर संपर्क साधून पोलिसांना माहिती दिली. घटनेची माहिती मिळताच पोलिस कर्मचारी यांनी घटनास्थळी धाव घेत प्राथमिक पाहणी केली. त्यांनी घडलेली परिस्थिती सहाय्यक पोलीस निरीक्षक सागर काळे यांना कळवल्यानंतर पोलिसांचा ताफा घटनास्थळी दाखल झाला. विभागीय पोलिस निरीक्षक यशवंत बाविस्कर यांनीही घटनास्थळी भेट देऊन पाहणी केली. दोघांचे मृतदेह पुढील तपासासाठी नामपूर ग्रामीण रुग्णालयात हलवण्यात आले. तेथे वैद्यकीय अधिकारी डॉ. निलेश हिरे आणि डॉ. स्वराज देशमुख यांनी शवविच्छेदन केले. त्यानंतर मृतदेह नातेवाईकांच्या ताब्यात देण्यात आले. श्रीपुरवडे येथे अंत्यंत शोकाकुल वातावरणात दोघा पती पत्नीवर अंत्यसंस्कार करण्यात आले असून त्यांच्या पश्चात एक मुलगा, दोन मुली व नातवंडे असा परिवार आहे.