Manoj Jarange : जरांगेंचं उपोषण मागे, तरीही काही ठिकाणी आंदोलन सुरूच; मुंबई- आग्रा महामार्ग रोखला

Maratha Reservation Protest:

राज्यात सध्या मराठा आरक्षाचा मुद्दा चांगलाच तापला आहे. सरकारच्या शिष्टमंडळाने भेट घेतल्यानंतर मनोज जरांगे पाटील यांनी उपोषण मागे घेत मुदत वाढवून दिली आहे. जरांगेंनी उपोषण मागे घेतले. मात्र राज्यातील विविध भागातील मराठा बांधव आपल्या आंदोलनाच्या भूमिकेवर ठाम आहेत. नाशिक, पंढरपुरमध्ये मराठा बांधवांनी आजही आरक्षणाच्या मागणीसाठी रास्ता रोको केला.

मुंबई- आग्रा महामार्गावर रास्ता रोको...

याबाबत सविस्तर माहिती अशी की, मनोज जरांगे पाटील (Manoj Jarange Patil) यांनी जरी आंदोलन मागे घेतले असले तरी संतप्त मराठा बांधवांकडून आंदोलन केले जात आहे. नाशिकमधील (Nashik) मराठा बांधवांनी आक्रमक भूमिका घेत मुंबई आग्रा महामार्गावर रास्ता रोको केला. या रास्ता रोकोमुळे महामार्गावरील वाहतुकही काही काळ ठप्प झाली.

तुळजापूरमध्ये मराठा बांधवांचा महामोर्चा...

मराठा आरक्षणाच्या मागणीसाठी तुळजापूरमध्ये (Tuljapur) महामोर्चा काढण्यात आला. या मोर्चामध्ये मनोज जरांगे यांच्या पत्नी सुमित्रा जरांगे पाटील सहभागी झाल्या आहेत. या मोर्चामध्ये सर्व जाती धर्मांच्या लोकांचा सहभाग आहे. तसेच वकील संघटना आणि तृथीय पंथियांनीही मराठा आरक्षणाच्या मागणीला पाठिंबा देत मोर्चामध्ये सहभाग घेतला.

सोलापूरमध्ये पदयात्रा..

दक्षिण सोलापूरमध्येही (Solapur) मराठा आरक्षणाच्या मागणीसाठी पदयात्रा काढण्यात आली. दक्षिण सोलापूर तालुक्यातील बोरमणी गावपासून जिल्हाधिकारी कार्यालयापर्यंत जवळपास २०- २५ किलोमीटरपर्यंत ही पदयात्रा निघाली.

मनोज जरांगे पाटील यांनी केवळ आमरण उपोषण मागे घेतले आहे. आरक्षणाची लढाई संपलेली नाही. सरकारला दोन महिन्याची मुदत दिली आहे, त्यावेळेत शासनाचे आरक्षण जाहीर करावे, अशा मागणीचे निवेदन जिल्हाधिकाऱ्यांना देण्यात आले आहे. (Latest Marathi News)