Water Issue : नाशिक, अहमदनगर विरुद्ध मराठवाडा पाणी संघर्ष पुन्हा पेटण्याची शक्यता, आज महत्त्वाची बैठक

Chhatrapati Sambhajinagar News :

राज्यात यावर्षी सरासरीपेक्षा कमी पावसाची नोंद झाली आहे. अनेक भागात पाण्याची स्थिती भीषण आहे. पाणीटंचाईमुळे टँकरने पाणीपुरवठा केला जात आहे. येत्या काळात नाशिक, अहमदनगर विरुद्ध मराठवाडा यांच्यात पाण्यासाठीचा संघर्ष पुन्हा पेटण्याची चिन्हं आहेत. (Latest News Update)

गोदावरी खोऱ्यातील उपलब्ध पाणीसाठ्याबाबत महत्त्वाची बैठक पार पडणार आहे. अपुऱ्या पावसामुळे नाशिक, अहमदनगरसह मराठवाड्याची चिंता वाढली आहे. जलसंपत्ती नियमन धोरणानुसार वरच्या धरणांमधून जायकवाडीला पाणी सोडावं लागण्याची शक्यता आहे. यासाठी छत्रपती संभाजीनगरमध्ये गोदावरी खोरे पाटबंधारे विकास महामंडळाची आज बैठक पार पडणार आहे.

जलसंपत्ती नियमन धोरणानुसार जायकवाडी धरण ६५ टक्के भरल्यास गंगापूर धरणात ८२, दारणा १०० तर पालखेड ८२ टक्के पाणीसाठा ठेवण्याची मुभा आहे. सद्यस्थितीत जायकवाडी धरणात फक्त ४८ टक्केच पाणीसाठा असल्याने वरच्या धरणांमधून पाणी सोडावं लागण्याची शक्यता आहे.

पावसाळ्यात वरच्या धरणांमधून नेमकं किती पाणी जायकवाडीला गेलं? आता किती पाणी सोडायचं? याबाबत बैठकीत चर्चा होऊन निर्णय होण्याची शक्यता आहे. नाशिक आणि अहमदनगरमधील धरणांमध्ये आधीच कमी पाणीसाठा असल्यानं पाणी सोडण्याचा निर्णय झाल्यास विरोध वाढण्याची शक्यता आहे.