विधानसभा निवडणुकीचं रण तापलं असून, महाराष्ट्रात ऐन दिवाळीत प्रचारसभांमधून आरोप-प्रत्यारोप, टीका-प्रतिटीकांचे फटाके फुटू लागले आहेत. आता महायुती आणि महाविकास आघाडीच्या वरिष्ठ नेत्यांच्या सभांमुळं राजकीय आखाडा आणखी तापणार आहे.
महायुतीच्या स्टार प्रचारक असलेल्या नेत्यांनी उमेदवारांसाठी महाराष्ट्रात सभांचा धडाका लावला आहे. आता देशाचे पंतप्रधान नरेंद्र मोदी देखील महायुतीच्या उमेदवारांच्या प्रचारासाठी महाराष्ट्रात येणार आहेत. येत्या ८ नोव्हेंबरला नाशिक आणि धुळे येथे पंतप्रधान मोदींच्या सभा होतील, अशी माहिती भाजप नेते गिरीश महाजन यांनी दिली.
नाशिक येथील पंचवटी परिसरातील मोदी मैदानावरच महायुतीच्या उमेदवारांसाठी पंतप्रधान मोदींची सभा होईल. सभेच्या तयारीसाठी भाजप नेते गिरीश महाजन यांच्याकडून मैदानाची पाहणी करण्यात आली. ८ तारखेला महायुतीची सभा होईल. पंतप्रधान मोदी सभेला संबोधित करतील. उत्तर महाराष्ट्रात मोदींच्या दोन सभा होणार आहेत. नाशिक आणि धुळ्यात या प्रचारसभा असतील. या रेकॉर्ड ब्रेक सभा होतील, असा विश्वास गिरीश महाजन यांनी व्यक्त केला आहे.
नाशिक येथील मैदानाला मोदी मैदान असे नाव देण्यात आले आहे. लाखोंच्या उपस्थितीत ही सभा होईल. केंद्रातील इतर नेत्यांच्याही सभा होणार आहेत. पीएम मोदी हे महाराष्ट्राला जास्त वेळ देणार आहेत, असेही महाजन यांनी सांगितले. नाशिककडे अजिबात दुर्लक्ष नाही. मी धुळ्याला पण होतो. नंदूरबारला देखील जाणार आहे. नगरसह पाच जिल्ह्यांत मी फिरणार आहे, असेही महाजन यांनी स्पष्ट केले.
पंतप्रधान नरेंद्र मोदी विधानसभा निवडणूक काळात महायुतीच्या उमेदवारांच्या प्रचारासाठी महाराष्ट्रात दौरे करणार आहेत. त्यांच्या ठिकठिकाणी प्रचारसभा होतील. १२ नोव्हेंबरला ते सोलापूर दौऱ्यावर येणार आहेत. मोदी यांची शहरातील होम मैदानावर जाहीर सभा होणार आहे. सोलापूर जिल्ह्यातील ११ विधानसभा मतदारसंघांतील उमेदवारांच्या प्रचारासाठी ते सोलापुरात येणार आहेत, असे सांगण्यात येत आहे.
सकाळ+चे सदस्य व्हा
Read Marathi news and watch Live TV. Breaking news from Maharashtra, India, Pune, Mumbai, Politics, Entertainment, Sports, Lifestyle at SaamTV. Get Live Marathi news on Mobile. Download the Saam Tv app for Android and IOS.