Leopard Attack : घरासमोर खेळणाऱ्या बालकावर बिबट्याचा हल्ला; नागरिकांनी धाव घेतल्याने सुदैवाने वाचले प्राण

सागर निकवाडे 

नंदुरबार : नंदुरबार जिल्ह्यात बिबट्यांच्या हल्ल्यात मोठ्या प्रमाणात वाढ झाली आहे. बिबट्यावर वारंवार होत असलेल्या हल्ल्यांमुळे परिसरात भीतीचे वातावरण पसरले आहे. दरम्यान दोन दिवसांपूर्वी बिबट्याच्या हल्ल्यात एका चिमुकल्याचा जीव गेला आहे. यानंतर घरासमोर खेळत असलेल्या बालकावर बिबट्याने हल्ला केल्याची घटना तळोदा तालुक्यात घडली. 

सातपुडा पायथ्याशी असलेल्या तळोदा तालुक्यात वन्य प्राण्यांचा मोठ्या प्रमाणात वावर आहे. यात प्रामुख्याने बिबट्या वस्तीत येत असून अनेकांवर हल्ले झाल्याच्या घटना देखील घडल्या आहेत. दोनच दिवसांपूर्वी तळोदा तालुक्यात शेतात काम करणाऱ्या कुटुंबावर बिबट्याने हल्ला केला होता. यात एका आठ वर्षीय चिमुकल्याचा जीव गेला आहे. हि घटना ताजी असतानाच तळोदा शहराला लागून गुजरातच्या आमोदा गावात घरासमोर खेळत असलेल्या चार वर्षीय बालकावर बिबट्याने हल्ला केला. 

दरम्यान या चार वर्षाच्या बालकावर हल्ला केला असता बालक जिवाच्या आकांताने ओरडला. बालकाला बिबट्याने पंज्यात पकडल्याचे मुलामागून जाणाऱ्या मुलाच्या आईच्या व एका गावकर्यांच्या लक्षात आले. यानंतर त्या गावकऱ्यांनी हातातील लाकडी मुसळ बिबट्याच्या तोंडावर मारून बालकाला बिबट्याच्या तावडीतून सोडवत प्राण वाचविले. यानंतर गंभीर जखमी बालकाला उपजिल्हा रुग्णालय तळोदा येथे दाखल केल असून बालकाची प्रकृती आता चांगली असल्याची माहिती मिळाली आहे.

बिबट्या लागलीच जेरबंद 

घटना घडली यावेळी आजूबाजूच्या लोकांनी वेळीच धाव घेऊन बालकाला बिबट्याच्या तावडीतून सोडविले. तर परिसरात नरभक्षक बिबट्याचा वावर असल्याची माहिती वन विभागाला देण्यात आली. याची दखल घेत लगेच गुजरात वनविभागाने त्या भागात पिंजरा लावला. दुसऱ्याच दिवशी हल्लेखोर बिबट्या जेरबंद झाला आहे.